Августрал 26-нний МахIач­къалалив, Университетрал майданнив, Къурхъмасовлул цIанийсса кIичIиравусса къатрал чIирай цIакь дунни филологиялул элмурдал доктор, профессор, Дагъусттаннал литературоведениялул гьану бивзминнавасса аьлимчу, Дагъусттаннал элмулул лайкь хьусса ишккакку, Гъумучатусса Хъассихъал Апаннинал суратращалсса мармарчарил ула.

Мероприятиялий гьуртту хьуна МахIачкъалаллал администрациялул ва Лакрал райондалул вакилтал, Аьрасатнал элмурдал академиялул Мазрал, литературалул ва магьирлугърал институтрал (ИЯЛИ) сотрудниктал, журналистътал, дустал-гьалмахтал, мачча-гъанми. БавтIцири барча буллалисса махъ лахълай, Лакрал райондалул депутат, ДГУ-лул доцент Тамирлан МахIаммадовлул кIицI лавгуна, профессор Апанни Хъассиев яхъанай ивкIсса къатрачIан чIявусса агьлу бавтIун бушаврил ганал хIурмат лахъну бушиву ккаккан буллалишиву.

Аьрасатнал лайкь хьусса учитель Галина Къараевал кIицI лавгуна, цинмагу пахру бушиву захIматрайну, бюхъу-гьунарданийну Дагъусттан гьаз буллай, зий ивкIсса маччачуная-аьлимчуная ва лак бакъагу, цайми миллатирттал инсанталгу ванал цIа гьаз дуллалисса мероприятиялийн бувкIун бушиврия.

«Апанни Хъассиев лакрал литература лахьлай, ахттар дуллай, таржума дуллай хъуннасса хъар ларсъсса хIакьсса аьлим­чугур, аслийсса патриотгур. Ваналгу, ванал уртакьтуралгу яла хъунмур мурад бивкIссар миллатрал мазругу, мазурдийсса литературагу хьхьичIуннай хъит учин дувансса. Вайннал захIматрал кьадру бакъахьурча, бучIантIимунийнсса вихшалагу дакъассар. Аманат кунма, кьадрулий ябуван аьркинссар жува миллатрал аьмсса хъусгу, ххазинагу – ниттил маз», – увкуна ванил.

МахIачкъалаллал Культуралул управлениялул хъунаманал хъиривмур Заидат Аьбдулманаповал увкуна: «Апанни Юшаевичлул захIматран багьа бищун къахьунссар, ванал дагъусттаннал литературоведение элмийсса школалул лахъсса даражалийн гьаз дурну тIий. ХIакьину ХIукуматрал Аьрасатнал халкьуннал мазру буруччаврих хъуннасса къулагъас дуллалисса ппурттуву, хаснура ванал дурмунил агьамшиву ххишала хъанахъиссар. Вай къатрал чIарах нанисса гьарцагу инсаннан кIул хъанахъиссар Апанни Хъассиев Дагъусттаннал, Аьрасатнал элмулуву хъунмасса бутIа бивхьусса инсан ушиву». Филологиялул элмурдал доктор, ИЯЛИ-лул литературалул отделениялул каялувчи АхIмад Муртузялиевлул бувсунни, 44 шинай Апанни Хъассиев кIицI лавгсса институтраву зий ивкIшиву ва энциклопедиялул кIулшивуртту дусса аьлимчунал хIурмат коллективраву хъунмасса бивкIшиву.

«ХIакьинусса кьинигу, жу, ванал даврил уртакьтал, ишла дуллай буру ванал давуртту, захIмат. Вайннуйн чул бишлай буссар мазраха ва литературалуха зузими. Жул институтраву лакрал миллатрал хъинну гьунар бусса аьлимтал зий буссия: Апанни Хъассиев, Нурислан Жидалаев, Ися Аьбдуллаев, Сулайман АхIмадов ва цаймигу. ХIакьинумур тагьар пашмансса дур. Вай на кIицI лавгсса циняв аьлимтал бия шяраву бувсса, хъуни хьусса, шяраваллил багьу-бизу кIулсса, халкьуннава бувксса. Вайннан хъинну кIула ниттил мазрал кьадру, миллатрал культуралул багьа. На тавакъю буллай ура хасну жагьилсса лакрахьгу, дагъусттанлувтурахьгу: ябувара зула ппухълуннал хIурматрай ягу-бувну, зучIанма биян бувсса ниттил мазру. Миллатирттал мазру – миллатирттал хъусри.

Апанни Хъассиев ттул буттангу хъинну кIула, ттул ппу МахIаммад Муртязалиев 50 шинай университетраву яру мазрал дарсру дихьлай ивкIссар. Ччя-ччяни вай хьунабакьайва, нагу гьуртту шайссияв лях-карах ми хьунабакьавурттай ва мероприятиярттай. ЛяличIисса никирал агьлугу, аьлимталгу бия ми, жунма ми цукунчIав хъама битан къабучIиссар», – увкунни ванал.
«Дагъусттан» ГТРК-лул хъунама редакторнал хъиривчу, Аьрасатнал культуралул лайкь хьусса зузала Ссалам Хавчаевлул увкунни:
«Ва Къурхъмасовлул цIанийсса кIичIиравалу, совет кIичIиравалу, цIанихсса аьлимтурал ва машгьурсса инсантурал пантеонни. ХIакьину кIицI лавгунни машгьурсса аьлимтурал цIарду. Сайки ми цинявннащал ттул дусшиву, хIала-гьурттушиву дуссия, цачIу-чIарав талайгу буссияв лакку мазрал бучIантIимунихлу. На ххарину ура Апанни Хъассиевлун маччасса Галина Къараева ва мероприятиялий гьуртту хъанай бушиврия. Ва ппухълуннал аьралий тарих гьаз баврил ххуллий ва оьрчIан патриот тарбия дулаврил ххуллий хъуни-хъунисса давуртту дурсса хIакьсса педагогри, тарбиячири, дакI цIуцIаврийсса наставникри. Вава куццуй итххявхсса бур ванил душ Розагу, Латвиянаву дипломатну зузисса Айнагу. Вагур Галина Къараевал наслу. ДакI дарцIуну ура, Айнагу Латвиянаву оьрус мазрал ихтиярду дуруччаврицIун, лакку мазгу хъама къабитлай бушиврий. Гъурбатрай, чув-бухьурчангу, жува жула ниттил мазру ябуллан, буручлан аьркинссару».

БавтIцири барча буллалисса ихтилатру бувна «Гази-Кумух» фондрал хъунама Тамирлан ХIабибуллаевлул, МВД-лул полковник Анзор СалихIовлул, ЦIуссалакрал райондалул Социал фондрал вакил ТIалхIат Исмяиловлул. БавтIцириннахь барчаллагь тIисса ихтилат бувна мачча-гъаннал цIанияту Латвиянавусса Аьрасатнал посольствалул кIилчинмур секретарь Айна Хъассиевал.
«Жува хIакьину щалва оьрму ниттил маз яшаврил ва машгьур шаврил ххуллий гьан бувсса инсан дакIнин утан бавтIун буру. Апанни Хъассиев школардансса ва педагогический техникумирттансса луттирду, хрестоматияртту сакин бувмагур, редакторгур. Ванал 1971 шинал итабавкьуссар лакрал шаэртурал шеърирдал лу – «Буттахъал балайрду». Жу ва лу цIуницIа итабакьинсса мурадрай бувкру Аьрасатнал элмурдал академиялул Языкознаниялул институтрайн. Ва лу оьрус мазрайнгу таржума бувансса мурад буссар. Буттахъал балайрду абадлий экьи най бикIувча!» – увкунни Айнал, ва кьини тарихравугу, тухумрал оьрмулувугу личIантIишиврий чIурчIавгу дурну.