Августрал 30-нний, кIюр­ххицIун, МахIачкъалалия Гъумукунсса, «Мамраш – Ташкапур – Араканский мост» автотрассалул 161+ километралийсса, Шахьуйннал шяраваллил хьхьичIсса ххуллийн зунттул хъачI леркьун, аьраххуллу бавщуну буссия.

Ва иширал ялув жул хъун бакъасса ихтилат хьунни «РСО» АО-рал «Лакралмур» филиалданул инженер Бахттияр Бариевлущал:
– Гужсса гъарал сававну лахIуни рурцун, Лакрал ва Ккуллал районну лирчIун дуссия ххуллу бакъа. Аьраххуллийн левкьсса зунттуясса хъунисса чартту, кьунтту, аьрщи гилуннай, Шахьуйннал шяравун нанимур ххуллийнгу леркьун, ва шяравалугу ттигу-шилагу дур машиналий гьан, бучIан къахъанай.

«Дагестанавтодорданул» анаварну кьамул бувсса хIукмулийн бувну, шиккун бивчуссия ххуллул хасъсса техникалул 6 единица (2 экскаватор, 2 погрузчик, 2 самосвал). Му кьинива тIивтIуссия ГьунчIукьатIрал ва БахIикIуллал шяраваллал дянихсса лухччайх бивхьусса, чарабакъул ишла бувансса, республикалул агьамшиву думур трассалийн буккансса ххуллу.
Августрал 31-нния шинмай тIивтIуссар агьаммур ххуллугу, амма, цалсса, чIумуйсса схемалий.

ЦIанасса чIумал марцI буллай булувкьуну буссар ва кIанайсса аьраххуллу ва ванил лултту тихунмайсса Шахьуйннал шяравунмур ххуллу. Ттигу гьантри хьунссар ххуллу жува аьдатсса режимрай тIитIиннин. Цалсса, тавакъюри агьалинахь, чара бакъашиву дакъа, ххуллийн къабуккаву. БахIикIлахчIинсса ххуллугу гьавалул тагьар ххуйсса чIумал буккан шайсса бухьурчангу, гъарал ларчIни ччех бикIлакIисса, машинартту кьяркьаравун кьутIлатIисса, нигьачIисса ххуллур.