Августрал 22-нний Москавлив, билаятрал гьарцагу мурцIниясса 3000 делегат гьурттуну «Единая Россиялул» XXIII съездрал кIилчинмур этап къуртал дунни: кьамул дунни ххюра шинал мутталий зунтIисса Халкьуннал программа. Ва документрал гьанулий билаятрал циняв регионнаясса агьалиная дуркIсса 3,5 миллион предложениярттал ххал диргьуну дур.

Съездрайсса Дагъусттаннал делегациялул каялувчину уссия Республикалул парламентрал председатель, «Единая Россиялул» региондалул отделениялул Секретарь Заур Аскандаров.
Делегатътуравух бия МахIачкъалаллал мэр ­Жамбулат Салавов, вава шагьрулул Депутатътурал Мажлисрал председатель Хиби ­Аьлиев, Аьрасатнал Виричу Энвер Набиев ва цаймигу бусравсса инсантал. КIанттул делегатътуравух буссия МахIачкъалаллал 54-мур школалул директор, Аьрасатнал Виричу НурмахIаммад ХIажимахIаммадовлул нину Сапижат Мазаевагу. Ванил укун бувсунни съездрал хIакъираву:
«Ттун, Виричунал нину ва жяматийсса ишккакку хIисаврай, даши бивзу­нни СВО-лий гьуртту хьуми­ннах ва миннал кулпатирттах дагьайкунсса къулагъас дикIан аьркинссар тIисса кIантту. СВО-лий жанну дуллусса вирттаврал щахъаннин, оьрчIан психологтурал кумаг аьркин багьлагьиссар. Аьралитурал оьрчIащалсса давривун наставниктал хIисаврай ветерантал кIункIу булларчангу, мюнпат бикIантIиссар. Вай масъаларттугу Партиялул программалул гьаз бувну, лайкьсса даражалий чулийн буккан буванссар тIий бура. Ватандалул мурадру буручлачимигу, миннал кулпатругу Партиялун хъама къабитлай бушиву аьлтта чIалай бия съездрал даврива.
Аьрасатнал президент Владимир Путиннулгу кIицI лавгунни, «Единая Россиялул» программалувусса гьарцагу ххуттахлу жаваб дулун аьркиншиву, хьхьичIун ­лавсмур бартбигьин аьркиншиву.

Вара тема гьаз дурна «Единая Россиялул» председатель Дмитрий Медведевлущалсса хьунабакьаврийгу. Партиялул активращалсса хьунабакьаврийн оьвкуминнавух нагу буссияв, Медведевлул чIурчIав дунни Аьрасатнал хъами фронтрай ва къинттуллух хъунмасса бутIа бихьлай бушиврий СВО-лул мурадру бакIуйн буккан баврил ххуллий. КIилчин хьхьичI ххуттайн ласунмур масъала бур педагогикалуцIун бавхIусса. Дагъусттаннал лайкь хьусса учитель хIисаврайгу, школалул ва оьрчIал бучIантIимунил ялув буруккинттарайсса педагог хIисаврайгу, кIулшиву дулаврил даву сантирай магьир даврил, хьхьичIуннай даврил ххуллийгу мюнпатсса хIукмурду кьамул буванссар тIий бура.
Халкьуннал программалул ца агьамсса цамургу масъала – агьалинал дянивса харж МРОТ-рал даражалийн ( 35 000 къурушрайн) кIункIу-хъит бувавур.
Демография, экономика, цIуллу-сагъшиву дуруччаву, социал блок, культура – гьарзат хIисавравун лавсъссар Халкьуннал программалуву».
ПатIимат Рамазанова