ЦIусса рюкзакирттащал школалийн
Августрал 25-нний МахIачкъалалив чIявусса оьрчIру бавтIсса кIанай ххари-шадсса чIурдугу бия, пиш тIисса симаннугу дия.
«ОьрчI школалийн хIадур ува» тIисса акциялул лагрулий тамансса агьлу бавтIун бия оьрчIру ххари бан, хъиншиврул ххуллийсса давриву бутIа бишин. Аьдатрайн бувну, «Инсан» фондрал сипталийну 500 оьрчIан школалий ишла дулланмунил бувцIусса цIусса рюкзакругу буллуна, 7000 къуруш гьарманангу. Гьуртту хьуна ва ххуйсса мероприятиялий Дагъусттаннал муфтинал маслихIатчи Айна ХIамзатовагу.
Шиккува кIицI лаган, аьмну республикалий «Инсан» фондрал кумаграцIух школалийн хIадур бувссар 5000 оьрчI.
«Кумагру личIи-личIисса журалул бия, хIатта школ-лаххиялул кумаг буллалисса бия. Меценатътал, предпринимательтал, волонтертал, блогертал, кIива мукъуйну учиннив, дакIру хъинсса инсантал цачIун хьуну бия. Ва ххуйсса акция, шиная шинайн тIиссаксса, сийлувун дагьаврил дакIру ххари дуллай дур, оьрчIан оьрмулухун дакIний личIайссар укунсса хъиншиву», – увкунни кIицI лавгсса Фондрал вакилнал.