[dropcap]А[/dropcap]прельданул 18-нний Миллатирттал библиотекалул конференц-залдануву жулла республикалийсса Россельхознадзорданул ттинин вайннал пишакартурал дурсса давурттал хIасиллу дуллалисса гьарта-гьарзасса батIаву дурунни.Идаралул каялувчитал бакъасса, ваний гьуртту хьунни ДР-лул шяраваллил хозяйствалул министрнал хъиривчу Ш.БахIарчиев, ДР-лул тIабиаьтрал сурсатирттал ва экологиялул министрнал хъиривчу А. Сайпуллаев, Дагъусттаннал аграрный университетрал ректор З.Жамбулатов ва цаймигу.

---

З.АьбдурахIманова
[dropcap]Б[/dropcap]атIаврил мурадгу бия ларгмур кварталданий ва идаралул пишакартурал биттур бувсса буржирдая бусансса.
БатIаву дачин дурну ия Россельхознадзорданул Дагъусттаннай­сса Управлениялул каялувчи Кьурбан ХIажиев. Ванал кIицI ларгунни Россельхознадзорданул даврил агьаммур бурж ва аралуву халкьуннал чулухасса низамлиявур­ттал хъирив багьаву бакъасса, ми хьун къаритансса чаранну лякъавугу бушиву.

Жула халкьуннал аьрщи ишла давриву, бугьансса гьанна машан ласавриву, дикIул, накIлил продукция даххан дуккан давриву ва цаймигу иширттаву гъалатIру лякъаврил хъунмур сававгу, Россельхознадзорданул пишакартурал бусаврийну, дусса дур халкьуннан цалла ихтиярду ва цаятурасса тIалавшиннарду къакIулшиву.

Шиккува кIицI лаган, пландалий ккаккан дурсса проверкарду чан хьуну дусса дур хIукуматрал «надзорданул каникуллу» баян бувну махъ. Ва чаран хIукуматрал кьамул бувссар ялув бавцIусса хасъсса къуллугъирттал , вайннувух Россельхознадзорданулгу, низамрай , тIайлану зузисса предприятияртту ххал буллай, оьнма-аьдада авара къабулланшиврул. ХIасил, ялув бацIан буржлувсса къуллугъирттая тIалав буллай бу­ссар къатIайлану зузисса предприятияртту ххал буллан, минналми тIайладакъашивуртту ялун личин дуллан.

Фитосанитариялул тагьар цукунсса дурив ххал дан Россельхознадзорданул пишакартурал ларгмур шинал 800 азарда гектар аьрщарал ххал дуршиву. Цала лабораториярттаву дугьай аьрщирдал тагьар кIул даншиврул вайннал 777 проба лавсун бур.
Ветеринариялул аралуву, ятту-гъаттарал дикI, накI даххайсса ва халкьуннал дукра дукайсса кIанттурдай ва шин дайдирхьуния шиннай 16 проверка дурну дур. Вайннуйн бувну, ашкара хьуну бур чIявуми кIанттурдай ишла дуллалисса дукия, дикIул продукция ветеринариялул цукунчIавсса ча­гъар, ихтияр дакъа машан ларсъсса душиву.

Ларгмур шинал мукун тикку-шикку , хъирив къалавну дикIул, накIлил продуктру дахлахисса кIанттурдая лавсъсса пробарду ххал бивгьуну махъ ялун ливчуну бур бруцеллезрал, парагриппрал, Ньюкаслул азарданул, лелуххант­рал микаплазмоз тIисса вирусру дусса ишру.
Фитосанитариялул ялув бав­цIуми пишакартурал ларгмур шинал 6, 5 азарда транспорт ххал дурну дур ва гьашинусса шин дайдирхьуния шиннай-1200 транспорт.

БатIаврил ахирданий ишбажаранчитурал ва муниципал сакиншиннардал отделлал пишакартурал суаллахьхьун жавабру дуллалисса ва къатIайлану аьрщи ишла дуллали­сса иширттал хIакъиравусса ихтилат­ру хьунни.