Яла чIивима наркоманнан дур 11 шин

Яла чIивима наркоманнан дур 11 шин

Вай гьантрай МахIачкъалалив Р. ХIамзатовлул цIанийсса библиотекалул конференц-залдануву хьунни реабилитациялул программардая хъунмасса мюнпат ласаву мурадрайсса «Кавказ» тIисса Дунияллул халкьуннал дянивсса ассоциациялул (М.А.К.) ккуркки стол.


Андриана Аьбдуллаева
Мунил даву дачин дурну бия М.А.К.-рал президент Хасайбат Валиева.
Шикку гьуртту хьунни Ассоциациялул правлениялул председатель ХIажимурад МахIаммадов, «Интерсталь» ООО-лул генеральный директор Анатолий Овчинников, Дунияллул халкьуннал дянив­сса клиникалул ва реабилитациялул центрданул вице-президент Заурбек МахIаммадов, Грозный шагьрулийсса «Ахмат» клубрал директор Адам Жавбатиров, ЦIуллу-сагъшиву дуруччаврил, Жагьилтурал, Спортрал, ЗахIматрал министерстварттал ва реабилитациялул центрдал вакилтал.

БатIаврил мурад бия хIачIаври­хун ва наркотикирттахун багьми, захIматсса тагьарданува буккан бувну, хъин баву мурадрай сакин дур­сса реабилитациялул программарду ххал дигьаву ва миннуя ххишаласса мюнпат ласунсса чаран лякъаву.
Наркоманиялул ва хIачIаврил масъала Дагъусттаннай махъсса ппурттуву ца яла цIурувкьюмунин ккалли бан бучIину бур.
ЦIанасса заманнай чIявусса личIи-личIисса журалул наркотикру бувккун бушиврулгу тагьар хъиннура захIмат дуллай дур. Наркотикирттал инсаннал цIуллу-сагъшиврун ва психикалун хъунмасса зарал биян буллай бур.

Ва, так ца миннухун багьминнан ба­къассагу, цинявннангу нигьачIаву дусса масъала бур. Мунийн бувну, республикалий наркоманиялул ва хIачIаврил тагьар ххуй чулиннай даххана даву мурадрай ХIажимурад МахIаммадов хIарачат буллай ур ва давривун кIункIу бан региондалул каялувшиндарал органнал, Виваллил иширттал министерствалул, ЗакондалуцIун кабавкьуну наркотикру ишакаш буллалиминнащал талатисса управлениялул, шагьрурдал администрациярттал вакилтал, медициналул идарарттал ва наркологиялул клиникарттал зузалт. Так аьмсса хIарачатрайну бюхъан тIий бур захIматсса тагьарданувун багьминнан кумаг бан ва ялун нанисса ник наркоманиялия ва хIачIаврия дуруччин.

Аьрасатнал ЦIуллу-сагъшиву дуруччаврил министерствалул статистикалийн бувну, хIакьинусса кьини сияхIрай ур наркотикру ишла буллалисса 600 азара инсан. Махъсса ххюра шинал дянив ми чан-чIяву хьуну бакъар. СоццIуххавурттал чIалачIи бувмунийн бувну, мудан наркотикру ишла буллай бур 2 миллиондалия ливчусса инсантал.

Мигу чIявуми бур балугъравун къабивсса ва 24 шин хьуннинсса жагьилтал.
ХIакьину Дагъусттаннай яла оьрмулул чIивима пациент 11 шинавусса душ бур. Наркоманиялун ххуллу кьукьаву мурадрай аьркинну дур мюнпат ххисса профилактикалул ва реабилитациялул система зузи дан, наркотикирттахун багьми бяйкьу ххуллия личин бан, миннан дуклансса, пиша лахьхьинсса шартIру дузал дан.

«Кавказ» тIисса дунияллул халкьуннал дянивсса Ассоциациялувун бухлай бур Дагъусттаннайсса цаппара реабилитациялул центрду. Дагъусттаннай мукунсса 10 центр бур. Центрдай зий бур лавайсса даражалул пишакартал. Пациентътал хъин бувну махъ пишакартурал кумаг буллай бур миннан цIусса оьрмулийн аьдат хьун. ЦIанасса чIумал Ассоциациялувун бухлай бур арамтуннанссагу, хъаннинссагу ххюва центр. Пикри бур цаппара центрду ттигу тIитIинсса.

Читайте также: