Мартрал 25-нний Ккулув Ялтту арив хьунни, райондалийсса школарттал дуклаки оьрчIал командардал дянивсса, «Бурчул ттуп» завалул турнир. Му сакин дурну дия Ккуллал райондалул жагьилтурал политикалул, физкультуралул ва спортрал комитетрал, «Жагьилтал сагъ-саламатсса оьрму бутаврихлу» цIанилу.
Турнирданий гьуртту хьуну дия 7 команда. Турнир тIитIлай, махъ лавхъуна Ккуллал райондалул жагьилтурал политикалул комитетрал бакIчи МахIаммад Чариновлул, физкультуралул ва спортрал комитетрал бакIчи Арсен ХIажиевлул. Вайннал цалва ихтилатирттаву кIицI бувуна спортрал чулухуннайсса ччаву дуний, жагьилтурал хасият кьянкьа шайшиву, укунсса тIуркIурдай буклакиний шяраваллал жагьилтурал дянивсса дусшиву хъиннура цIакь шайшиву, дусшиву дуний душманнал хьхьичI бацIан бигьану бикIайшиву.
Соревнования ларгуна хъинну ххуйну. Ххув хьуна Ккуллал шяраваллил, Аьрасатнал Виричу Халид Мурачуевлул цIанийсса, 1-мур школалул команда. КIилчинмур кIану лавсуна ЦIуйшиял школалул командалул. Ххув хьуминнан дуллуна физкультуралул ва спортрал комитетрал чулухасса грамотартту ва футболданий буккай ттупру.
