Ккуллал райондалийсса школардал дукIу итабакьлакьисса дуклаки оьрчIал хьхьарану ЕГЭ дулаврия, гай экзаменну дуллалиний итадаркьусса диялдакъашивурттая хъунмасса аваза бия. Улу Дагъусттаннал КIулшиву дулаврил министерствалун Ккуллал райондалийсса УО-рал хъунама аххана увну, цама итан багьуна. БакIраяту «аьрава» гукунна най диркIун, утти махъ Ккуллал райондалул администрация, райондалул УО-лул хъунама АхIмадов Шамил, шикку зузисса методистал школардал директортурая, предметирттал учительтурая тIалавшинна дуллалаврищал, цивппагу ялув бавцIуну ЕГЭ-лийн хIадур хъанахъисса давурттив щурун диркIунни.
Дуллай бур предметирттал олимпиадарду, конкурсру, «тIиртIу» дарсру. Март зуруй бунни «Юный краевед» тIисса конкурс. Ванил мурадру бур школалул оьрчIру кIул баву ватандалул культуралущал, тарихращал, элму ахттар дуваврил чулинмайсса гъира дуклаки оьрчIаву хIасул баву. Ванийну кIул хъанай буссар цума оьрчIаву ци пагьму буссарив. Ва конкурсравух гьуртту хьуну бур 14-17 шинавусса дуклаки оьрчIру. Ва конкурсрал сакиншинначи, УО-рал методист АхIмадов Нураттиннул ттухь бувсуна конкурсравух гьуртту хьушиву Ваччиял, ЧIяйннал, Вихьуллал, 1-мур ЦIувкIуллал, 2-мур ЦIувкIуллал, Ккуллал 1-мур, Къяннал, ЦIущуллал школарду. Конкурсрал жямру дуллалисса жюрилул ххуйсса давуну ккаккан дурну дур Ваччиял школалул 9-мур классрал дуклаки оьрчI Загьидиев МахIаммадлул даву. Ванан дуллуну дур УО-лул чулухасса ХIурматрал грамота. Вайми школардаясса ххуйсса давурттив чирчусса оьрчIангу дуллуну дур грамотартту. АхIмадов Нураттиннул кIицI бувуна Загьидиев МахIаммад гьантIишиву Республикалулмур конкурсрайнгу.
Мукунма 6-ми классирттал дуклаки оьрчIал дянив хьунни «Живая классика» конкурс. Ва конкурсрал сакиншинначи, УО-рал методист Загьидиева Иринал бувсуна ттухь ва конкурсраву ххув хьусса дуклаки оьрчIая: АхIмадов Шамил, Ваччиял школа; Р. 
Оьмаева, Хъусращиял школа; Ж. СаидахIмадов, Ккуллал 2-мур школа; А. Валиева, ЧIяйннал школа; М. Маммаева, Къяннал школа; К. Аьлиева, Вихьуллал школа. Ххув хьуминнан дуллуну дур УО-лул чулухасса грамотартту.
Агьаммур давуну хьунни мартрал 22-нний Ккуллал 2-мур школалий хьусса оьрус мазрал предметрал пробный ЕГЭ дулаву. Ва экзамен дулаврияту ттухь бувсуна Ккуллал райондалул УО-лул хъунама АхIмадов Шамиллул:
— Ккуллал 2-мур школалий хьуссар оьрус мазрал предметрал пробный ЕГЭ дулаву. Шикку гьуртту хьунни 120 выпускник. Вай хъанахъиссар сайки 99,8% выпусниктурал. Циняв давурттив зашифровать дурну дуссар. Вай ххал дуллантIиссар жулла райондалийсса школардай дарсру дихьлахьисса оьрус мазрал учительтал. Хъуннасса ва экзамендалийнсса хIадуршинна дунни ттул хъиривма Оьмариев Жамалуттиннул, экзамен дулай пунктрал руководитель МахIаммадов Аьлиллул. Гьай-гьай, гьарца зат жунма ччикунгу къашайхха. Аудиториялувун телефонну ларсун бувхсса кIива иш хьунни. Мукуна ца хIадуршинначи къаувкIсса иш хьунни. Умуд бур гьашину ва экзамен багьайсса куццуй дулунтIишиврийн.
Лажин хIадур дурссар ХIажимурад ХIусайновлул
