[dropcap]Ж[/dropcap]ул, ЧIяйннал, шяраву мудангу бивкIун бур чIявусса ва цIанихсса тухумру. Миннуву бур, миха-тиха бувкIун бивкIун, яла шиккува миналул хьуссагу.
Жулмур тухумрал цIа най дур АьвдурахIман тIисса чувнал цIания. Му хъанай ур ттул буттал буттал бутта. Мунаяр хьхьичIманайн, ттул буттал бусаврийн бувну, Оьмар чай­сса бивкIун бур, мунаямур чанну кIулли. Мунан цIа дирзссагу ттуна къакIулли, ухьунссар, цанчирча Оьмар тIисса цIа дирзсса шяраву 30-40 инсан ур. Ттул ниттил ппу ур Карин тIисса. Мунал канил пиша кьяпри баву диркIун дур. Мунаясса бусаларду чIявусса бур. Масала, ца ппурттуву цува кунасса кьяпрал усттарнащал ччалли кьяпри бувну, муналмур кьяпул кьимат лахъсса бивщуну бур.

[dropcap]К[/dropcap]арин-ттаттал гьанулул къяртригу най дур Кьадихъул тIисса тухумрая (буттал чулуха), ниттил Саманиятлул къяртта най дур СултIаьлихъул тIисса тухумрая. СултIаьлихъал тухумрая­сса бур Лайли Кьубахъул тIисса агьлугу. Султан АхIмадил Лола тIисса кулпат бивкIун бур Гуржинавасса, яла муния жула ла­кку зумуну Лайли хьуну бур.

Жул нину Асбат биялсса гьунарду буллусса инсан бия. Мунил 65 шинай дарс дирхьуссар ЧIяйннал дянивмур даражалул школалий. АцIра шин дурссар директоршиву дуллайгу. Ххаллилсса балайчи, хъаннил тямада, къавтIала, Дагъусттаннал лайкь хьусса учителья ттул нину. Цила сакин бувсса къавтIаврил коллективращал Москавлив лавгун бивкIссар.
Ниттирссу Марияннул къуртал бувссар Москавуллал университетрал библиотекалул факультет, чIярусса шиннардий Дагъусттаннал библиотекарттал даву гьаз дуллай, зий бивкIссар. Му буссия 20 шинай Дагъусттаннал луттирду баххай идаралул директорнугу. ЦIанагу, 92 шинаву, лайкьну къуццу буллай бур.

[dropcap]Б[/dropcap]утталмур тухумрал агьлу (Аьвдухъул, АьвдурахI­манхъул) бивкIун бур кувннал кув бувгьусса, кувннал чIарав кув хъинну бацIайсса агьлу. АьвдурахIманнул бивкIссар мукьа оьрчI ва ххюва душ: СутIа, Рамазан, МахIаммад, Жабраил, ПатIимат, Разият, Марижат, Аьйшат.
Ттул буттал ппу Рамазан увну ур 1878-ку шинал. Гьашину му увну хъанайгу дур 140 шин. Му цувагу яхьуну ур оьрмулул 93 шинайн ияннин. 1918-ку шинал увну ивкIсса ттул буттагу яхьу­ссия 90 шинай. Гьашину хъанай дур 100 шин.
Ттул ттаттал тухум ца махI­лалий яхъанай бивкIун бур. Ми мукьунналагу къатрал ялтту дирхьуну диркIсса тIаннул уттуссаннуя ттигу ливчIун бур цаппара парчри. Муний диркIун дур ххюцIаллахъул метрарду. Муксса лахъисса ва ганзсса уттусса цукун ва ча ххюрхху дурссарив махIаттал хьунсса иш бур.

Ттул хъунама буттауссу Ма­хIаммадлуйн дирзсса чулий цIа дур «ЦК» тIисса. Му, ити-ккакки, личIи акъая хасиятрал ва лащиндарал жула Жуковлуха. Мукьийла партиялува (КПСС) уккан увну, мукьилагу восстановить увну ивкIун ур.
Буттауссурвавраву кIилчинма ия дяъвилия чурххавусса ккуллалущал зана хьуну увкIсса инсан. Мунал ччимур даву дайва. АцIния мяйра шинаву Буйнакскаллал педучилищалул профсоюз организациялул хъунаману ивкIун ия. Муния махъгу колхозрал ва советрал председательнугу, Культуралул къатлул, ДОСААФ-рал, кинофикациялул хъунаманугу зий ивкIун ур райондалий. Хъинну паракьатсса, хIалимсса инсан ия, аьпа биву. Буттауссу МахIаммад-Рамазан ия 1-мур классрал юрист, милицанал майор. ЦIанагу, 92 шинаву, ва хъинну ххуйну, зана-кьулуну ур.

[dropcap]Б[/dropcap]уттарссу Маржанат халкьуннал хIакин бия, ччимур уртту-щин ва цайми халкьуннал дарурттал хIал кIулсса. ХIатта ятту-гъаттара хъин бангума ванийн оьвчайссия. Вай гьарзат ванин лавхьхьуну бия цила ниттицIа СахIивсултаннуцIа. Вава гьунар бия ттул ттаттал Рамазаннулгу.
Вана укун, ххаллилсса мархрая нанисса бур ниттил ва буттал чулухасса агьлу-авлад.
МахIаммад-Рамазан тIима буттауссил кIива душ бур, Саида, зий бур Санкт-Петербурглив адвокатну, кIилчинмургу, Галина, цила даврил хьхьичIунсса специалист бур. Вай душваврал нину, Асият, хъинну бакIралгу ххуйсса, даврил пагьмугу бусса дуссия. Му цурдагу дачIи яру, дачIи оьрус миллатраясса дия.
ЯлачIин Залимхан тIисса жул ссурахъугу гьарцагу чулуха итххявхсса уссия: шеъри чичаврил, балай учаврил, чяхир даврил ва м.ц. Оьтту бутIайсса станциялул хъунама хIакиннал хъиривчуну зий буссия гьарцанналгу чIарав бацIайсса ссурахъу Жавгьарат.

Китаб тIисса ссурахъу Къизлардал даралувусса Дагърыбалул хъунама ихтиологну зий ­уссия.
Ца жул буттал буттан (ттатта Рамазаннун) цIа дусса хъанай ур арула правнук. ЦIанин лайкьссагу бур цивппа.
Ттаттал бавал Китаб тIисса уссил хIакъираву бур укун­сса хаваргу. Ца ппурттуву, турк Да­гъусттаннайн бувкIсса чIумал, Китаб агьну ур Щурагьсса базаллувун. Базаллуву бивкIун бур маша буллали­сса туркнал аьскарталгу. Китаб гъан хьуну балчант бахлахисса кIанайн, балчан була куну бурк туркнахь, буртти ивкIун къуццу бан. Чан­сса кIири бичин бувну балчангу, яла була куну бур мархьгу. Буллуну бур. Улу яла, бивщуну мархьгу, лихъан бувну бур чу Лаккуйн бияннин. Цанма кIулсса кьюлтIсса ххуллурдайх увкIссия тIар СсурхIиял шяравун, Аскандархъул тIисса цала хъамаллурачIан. Муния махъ гьуртту хьуну ур га Аякьакьаллал талатавривухгу. Мичча су­кку хьуну, талай ивкIссар Фрунзе бакIчисса ЯтIул аьралуннавух, Перекопрайн ияннин. Буслан бикIай, му ВрангеллучIан личный приемрайнгу тIайла ув­ккун ивкIссар жула контрразведкалул, тIий. Му гьунарданухлу мунан Фрунзел цIа кусса маузер пишкаш бувну бивкIун бур. Укун виричусса инсан ивкIун ур Китаб. Мугу ччяни накьлу хьуну ур, 46 шинаву. Мунал ссурхIиял хъамаллуращал ттигу ххуйсса дусшиву дур жул.

[dropcap]Я[/dropcap]лагу жул тухумрай чан­сса бакъар ххуйсса ххуттай кIицI бан лайкьсса вакилтал: ТIалхIат АьбдурахIманов, Даггазрал хъу­нама бухгалтер, ДР-лул газрал промышленностьрал лайкь хьусса зузала; Китаблул арс Мусаев МахIаммад, ДАССР-нул экономикалул лайкьсса зузала; ДАССР-нул лайкь хьусса экономистътал: МахIаммадов Ибрагьин, СутIаев Руслан, СутIаева Мариян; лайкь хьусса учительтал: Рамазанова Светлана, АьвдурахIманов Сайду, Рамазанов Аслан, Мамедова (Мамаккуева) Альбина; ДР-лул Виваллил иширттал органнал лайкь хьу­сса зузала МахIаммадов ХIамид; аьрая­ллил подполковникнал чиндалун лайкь хьусса Кьадиев Тамирлан ва м.ц.

Ниттил Асватлул чулухасса агьулданува кIицI бан ччай бур: Руставели ва Шамил Кьадиевхъул, Санитариялул къуллугърал лайкь хьусса зузалт; Аьлилов Сулайман, балугърал хозяйстволул лайкь хьусса зузала ва м.ц.
Чичав ттущава бювхъу­сса куццуй ттунма кIулмур. Ци-бунугу, цу-унугу лях ливчIсса ухьурчагу, багъишла итанссара тIисса умудрай ура.
Рамазанов Мустангир

ХIадур бувссар
А. Аьбдуллаевал