Дагъусттаннал халкьуннал творчество – испаннал бургъилу

Дагъусттаннал халкьуннал творчество – испаннал бургъилу

Дагъусттаннаясса къавтIаврил коллектив «Эхо гор» фестивальданул кьюкьравух бачин хIадур хъанай

Июльданул 10-нния тиннай дайдирхьуссар Испаннаву Дагъусттаннал халкьуннал творчестволул кьинирду, цивгу лахъи лагантIисса августрал 15-нин.

Миннувух гьуртту хьун Испаннавун лавгссар ДР-лул Культуралул министерствалул РДНТ-лучIасса фольклорданул ва къавтIаврил ансамбль «Эхо гор» ва УнцIукIуллал шяравасса усттар МахIаммадаьли МахIаммадаьлиев.
Дагъусттаннал культура Испаннал билаятрай ккаккан даву дайдирхьуссар Мурсия шагьрулия, Дунияллул халкьуннал дянивсса фольклорданул 51-мур фестивальданий. Микку хьуссар Дагъусттаннал халкьуннал усттартурал цала карунних дурсса затурттил выставка, миннувух – бархъаллал тIахIунттивгу, хайдакь накьичгу.

МахIаммадаьли МахIаммадаьлиевлул ккаккан дурссар унцIукIуллал тIаннуйх муххал накьичру дишаврил мастер-класс.
Фестивальданий гьуртту хъанай бур Албаннавасса, Филиппиннаясса, Мексиканава­сса, Венгриянавасса ва Испаннал личIи-личIисса регионнаясса творчествалул коллективру. Мурсия шагьрулиймур фестиваль лахъи ларгссар июльданул 14-нин.

Фестивальданул шадлугъру уттинин хьуссар Испаннал Нарон, Мугардос, Солайн, Рибера-дель-Фресно ва цаймигу шагьрурдай, фестивальданул гьурттучитал хьунабавкьуссар цаппарасса шагьрурдал бакIчитуращал.
Ва проект щаллу дуллали­ссар АьФ-лул Культуралул министерствалул чIарав бацIаврийну. Проектрал мурад – СКФО-лул дунияллул халкьуннал дянив­сса культуралул коммуникация цIакь давур.

ХIадур бувссар
Бадрижамал Аьлиевал

Читайте также: