[dropcap]И[/dropcap]юль зурул 12-нний Избербашливсса «Бургъил зума» тIисса оьрчIал лагерьданий «Уттарасса классика» тIисса щалвагу Аьрасатнал чIава назмурду дуккултрал конкурсрай ххув хьусса дагъусттан оьрчIру хьунабавкьунни дуклаки оьрчIащал. Ва мероприятиегу хьунни ДР-лул элмулул ва кIулшиву дулаврил министр Уммупазил Оьмаровал сипталийну.

КIицI лавгсса лагерьданий бигьалаглай буссар, Дагъусттаннаясса бакъагу, Питердаясса, Луганскалиясса оьрчIругу.
ДИРО-лул проректор Миясат Муслимовал, хъамал, вожатыйтал ва дуклаки оьрчIру барча буллай, кIицI лавгунни щала лагерь тIутIавун ва щюллишиврувун бахьлавгун бушиву, оьрчIру бигьалагансса ххуйсса шартIру дузалну душиву.
Ва кьини лагерьдай бигьалаглагиминнал неъмат лавсунни пасихIну ва усттарну назмурду ккалаккиминная. Миннавух бия ПатIима Микаиловагу (ва июнь зурул цанний ЯтIул Майданнив хьусса конкурсрай ххув хьумурди). Миясат Муслимовал цилла хIадур дурсса литературалул викториналий ххув хьуминнан бахшишран буллунни машгьурсса чичултрал луттирдугу. Шеърирду бувккунни чIава шаэртурал Индира Зубаировал, МахIаммад Мусаевлул ва АхIмад Аьбдуллаевлул.
Нурият Аьбдуллаева,
журналистикалул отделениялул 1-мур курсрал студентка