Жагьилтал, сивсуну бачи хьхьичIунмай!

Уттигъанну Щалагу Аьрасатнал халкьуннал фронтрал жагьилтурал проектирдал Департаментрал каялувчи Игорь Костюкевичлулдаврил аьрххи бия Дагъусттаннал жагьилтуращал хьунаакьаврин хас бувсса.

Имара Саидова
[dropcap]К[/dropcap]остюкевичлул кIицI лавгунни «Жагьилтурал ОНФ-лул» даву цинявппа жагьилтуран цачIусса хъанахъишиву.
— Жу, кампаниялул форумру къабуллай, хьхьичI бивхьусса ма­съалартту иширайну дузрайн бу­ккан буллалисса чялишсса давур­тту дачин дурну буссару, — увкунни ванал.

Дагъусттаннайсса жагьилтуран кьимат бишлай, Костюкевичлул увкунни: «Цавай бур пахру-ххара буллай итталун багьан ччисса, цавай бур чялишну цалла давурттаха зузисса, цавайгу жула билаятрая цамунийн гьан ччисса ва цайми билаятирттая махъунмай зана хьун ччисса. Аммаки жува цинявппагу цачIун буллай буру так ца Ватандалухсса ччаврил».

Ванал мукунма бувсунни ОНФ-лул тарихраву гьашину цал­чин Калужский областьрай 200-нния ливчусса жагьилтурал гьурттушинна дувансса «Молодежка ОНФ» тIисса цIанилусса лагерь тIитIлатIишиву. Микку хьунтIиссар лидертал ва жямат­ращалсса давурттай зунсса пишакартал тарбия буллисса тренингру.

Костюкевичлул балжину бувсунни «майский» хIукмурду биттур баврил хIакъираву ОНФ-лул дан аьркинсса чара бакъасса давурттая.

— Жу пикрилий буру 12 жура­сса давуртту дачин дан. Микку чара бакъа гьуртту хьун аьркин­ссар Дагъусттаннал республикалиясса миллатирттал проектирдащалсса ва программарттащалсса жагьил­сса модератортал, — увкунни Костюкевичлул.

Ахирданий Костюкевичлул жяматийсса давриву хьхьичIунну зузисса жагьилтурайн барча­ллагь баян бунни ва дуллунни дакIний личIансса бахшишру.