В. ХIажиевлул
ва С. Мусаевлул
«Хронология Дагестана» тIисса луттирава
1724 шинал февраль зуруй османнал (туркнал) министртуран мукIру хьун багьссар, «дагъусттаннал циняв князьтурал Сурхай бей хъунаманан ккалли уллай бушиврий».
Июль 1724 ш. – Аьрасатнал ва Туркнал Константинополлал кьутIи.
Ва кьутIилийн бувну АьрасатнацIун цIакь бувссар Азирбижаннал ва Дагъусттаннал Каспийлул зуманицIухсса провинцияртту, Дагъусттаннал ва Азирбижаннал ливчIми кIанттурдугу, Гуржи ва Арманигу ТуркнацIун цIакь бувссар. Ширвангу Щамаххуллал хасъсса ханлугъну ккаккан бувссар. Дагъусттаннай султаннул властьрахьхьун лавгссар Ахтти, РутIул, ЦIахъюр ва Сурхайл биялдарахь диркIсса Кураллал цаппара аьрщив.
Гъази-Гъумучиял хъунама му кьутIилий къарязину ивкIссар. Султаннул хIарачат бувссар мугу, Къайтагъуллал хъунамагу цала чулийнмай кIункIу буван. Амма минналгу Гьанжи цахьхьунма булара тIисса тIалавшинна дурссар.
1725 ш. – зунттал агьалинал туркнащалсса дяъви бувссар Джинихи тIисса кIанттурдай.
1726. – Къубаллал (Кубинский) Хан ХIусайн – Аьлихан оьруснал подданстволийн кьамул увссар.
1727 ш. – Дагъусттаннай тIаоьн цIуцIаву (чума) ппив хьуссар.
1727 ш. – Документирттал исват буллай бур Щамаххуллал цIанийсса къизгъинсса дяъви най бивкIшиву. Туркнаща я маз-кьазрай, ягу гужрай Гъази-Гъумучиял хъунама цала чулийнай кIункIу уван хьуну бакъар. Му туркнайн энадрай увккун, Щамаххи кIунттихьхьун ласунсса кьасттирай ивкIун ур.
«Оьрусгу, туркгу хIарачатрай бивкIун бур му цала-цаламур чул бугьан уван, амма Сурхай, тагьаргу цIакьлин дургьуну, ишру цукун багьайрив ккаклай, ялугьлай ивкIун ур» (Лавров Л.И. Эпиграфические памятники… КIилчинмур бутIа. – 127 лажин).
Ираннал бияла хьхьара хьушивугу гьанулун лавсун, Гъази-Гъумучиял Сурхайл цува заллусса кIанттурдал дазурду гьарза-гьарта дурну дур, Гъумучату, Кураллава тIайла хьуну, Самурдая Къубаллавун дияннин.
1728 шин, январь. – Гъази-Гъумучиял Сурхай-хан Щамаххуллал хъунаману цIакь увну ур.
1728 шинал ХIажи-Давуд, хIиллалий Гьанжилив учIан увну, туркнал увгьуну ур. Родос тIисса жазиралийн тIайла увккун ур, микку хьуну дур мунал оьрмулул ахиргу.
Гъази-Гъумучиял Сурхай-хан Кураллал ва Аьрасатнахьхьун лавгсса кIанттурдал иширттавух чялишну хIала ухлан ивкIун ур.
Декабрь 1728 ш. – Сурхай-ханнал кьюкьри гьужумрай ххярххун дур оьруснал биялдарайсса Джевату, Сальян ва Муган шяраваллавун. Мигу ппив-ххив дурну, Гъази-гъумучиял аьрал Щамахлив зана хьуну бур. Яла Сурхай-ханнал «азарахъул Гъази-гъумучиричунал» кьюкьлущал Къячай тIайла увккун ур Кураллавун. Амма генерал Румянцевлул аьралуннаща ми байщун буван бювхъуну бур.
1729-1730 ш.ш. – Дагъусттаннай тIаоьн цIуцIаву сукку хьуну дур цIуницIа.
Июнь 1729 ш. – Сурхайл найп Маммадай ИстIамлив кьамул увну ур. ХIурматрай кьамул увсса му хIурматрай тIайлагу увккун ур, Сурхайн «Аьрасатнаща циксса кIанттурду зеххин бюхълай бурив зехлахуча» тIисса амругу бувну.
Декабрь. 1729 ш. – Сурхайл арс Муртазааьли ва Къарат-баг Дарбантуллал райондалийсса аьрасатнал мулкирайн ишан лархIусса аьрххилий бувккун бур.
1729 ш. – Сурхай-ханнал шахсаваннул аьрал ххит бувну бур. Шахсаван туркнал властьрайн къаршину гьаз хъанай бивкIун бур, Гъази-Гъумучиял ханнал гьужум бувну, ми Кураллая тихунмай байщун бувну бур.
1729 ш. – парснал шагь Тахмас КIилчинманал Туркная тIалав дурну дур миннал хъямала дурсса аьрщив зана дуваву.
1730 ш. – Надирдул туркнайн къаршийсса дяъви байбивхьуну бур.
Надир ххув хъанай ивкIун ур талатавурттаву. Туркнал хIукуматрал Сурхай-ханнахь миннат бувну бур цахлува уккан, мунал Испахан ласун кумаг буварча, ханшиврий итанну тIисса махъ буллуну бур.
Ираннал шагьгу Сурхай-ханнахь цахлува укку тIий миннат буллай ивкIун ур. Ираннал подданство кьамул дуварча, шагьнал Сурхай-хан вазирну итан махъ буллуну бур, Шамахуллал хъунаманал ва Дагъусттаннал валийнал къуллугъругу буллуну. Амма Сурхай-хан ми къуллугъирттайн тамахIкар къахъанай ивкIун ур.
1730 ш. – шагьнал делегация Шамахлив бувкIун бур. Кьуя илчи увкIун ур Сурхай-ханначIан, туркнайн къаршину гьаз хьунсса маслихIатращал. Миннаватусса 19 авттун, цаннахьхьун жавабращал зана хьунсса ихтияр дуллуну дур. Сурхай-хан шиитътурахлу-парснахлу къаивкIун урча, туркнахлу-суннитътурахлу ивкIун ур. Амма туркнащалсса аралувугу мунал цалла политика диркIун дур. Оьруснал аьралуннал главнокомандующий генерал Левашев чичлай ур: «Сурхай, хьхьичIа куна, Щамахлив яхъанай ур, туркналгу хъин ивтун ур», — тIий.
ХIадур бувссар П. Рамазановал
??
??
??
??
2
ХIадур бувссар П. Рамазановал
??
??
??
??
4
