[dropcap]И[/dropcap]юньдалул 28-нний МахIачкъалалив хьунни ДР-лул Халкьуннал Мажлисрал 24-мур сессия, бачин бувну ия парламентрал спикер Хизри Шихсаидов.
Депутатътурал, кIилчин дурккуну, кьамул дунни «Дагъусттан Республикалий муниципал къуллугърал хIакъираву» тIисса ва «Дагъусттан Республикалий цIушиннардал иширттал хIакъираву» тIисса, «Культуралул хIакъираву» тIисса, «Архиврал иширттал хIакъиравусса» тIисса ДР-лул законнавусса дахханашивуртту.
Депутатътурал кIилчин дурккуну, ххал диргьунни «Дагъусттан Республикалий патриотшиврий тарбия баврил масъалартту правалул гьанулийн буцаврил хIакъираву» тIисса закондалул проект. КIийлла дурккуну кьамул дунни «2018 шинайнсса ва пландалий ккаккан дурсса 2019 ва 2020 шиннардийнсса ДР-лул бюджетрал хIакъираву» тIисса ва «Гьар зурухсса оьрчIансса напакьалул хIакъираву» тIисса ДР-лул законнавусса дахханашивуртту.
КIилчинмур закондалул проектрай хьусса дахханашиврия буслай, ДР-лул захIматрал ва социал иширттал министр Расул Ибрагьимовлул кIицI бунни 2019 шинал январьдания шиннай оьрчIал гьар зурухсса напакьа бикIантIишиву 150 къуруш, цIана ми дур 112 къуруш.
Сессиялий ххал бивгьунни цаппара цаймигу масъалартту.
ХIадур бувссар
ХI. Аьдиловлул
