Июньдалул 7-нний Дагъусттаннал БакIчи Рамазан АьбдуллатIиповлул чIявусса оьрчI-бакI бусса АлбехIажиевхъал кулпатран буллунни ГАЗель автомашина. Ванияр хьхьичIгу, ОьрчIру буруччаврил кьини дуллалисса чIумал, Республикалул Каялувчинал кьамул бувну бивкIссар ва кулпат цалва кабинетраву. Та чIумал чIявусса оьрчIру бусса интернационал кулпатран (яручунал ва оьрус щарссанил) пишкаш дурну диркIссар ичIаллил техника. Гара кьини ДР-лул ЗахIматрал ва социал министерствалуйн тапшур бувну бивкIссар ва кулпатран ГАЗель машина пишкаш бан. Вана хIакьину Щалвагу Аьрасатнал кулпатрал, ххирашиврул ва дакI тIайлашиврул кьини (День семьи, любви и верности) шадлугърал тагьардануву пишкаш бунни цIусса машина. Рамазан АьбдуллатIиповлул увкусса куццуй, ва хъанахъи­ссар Дагъусттаннайсса яла эбрат­рансса кулпатирттавасса ца. Ва бур хъинну захIматрахун багьну ялапар хъанахъисса кулпат, АлбехIажиевхъал кулпатраву 9 оьрчI-бакI тарбия бувну бур. Кулпатраву дуручлай бур аьдат-эбадатру, традициярду, кулпатрал ххазинарду. ЧIявусса оьрчIру бу­сса кулпатирттан паччахIлугърал ка-кумаг буллантIиссар ттинияр тихунмайгу. Ва кулпатраву бивкIссар 11 оьрчI, яла 2 бивкIуну бур. КIива хъуними оьрчIал цалва-цалва кулпатру хьуну бур. АлбехIажиевхъал кулпатран АьФ-лул Президентнал дуллуссар «Родительская слава» орден.