Майрал 9-нний бувксса «Илчи» кказитрай (№18) жу бивщуссия Хъунмасса Буттал КIанттул цIанийсса дяъвилуву Совет Союзрал Виричу тIисса цIа дулун ккаккан бувну бивкIсса лакрая: Аьлиев Мурат Насруллаевичлуя, Аьлиев Камил-Кьади ПаттахIовичлуя ва Аьлибуттаев Аьбдул Гъапуровичлуя.
Андриана Аьбдуллаева
Ми хъиривлаявуртту дурсса цIа дурксса журналист, исследователь Андрей Борисович Цобдаевлул кIул увну ур Совет Союзрал Виричунал цIа дулун ккаккан увну ивкIсса уттигу ца лаккучу. Ва ур гвардиялул рядовой МахIаммадов Аьбдулла Жалилович, 1910 шинал увсса.
Дяъвилийн увцуну ур ДАССР-данул МахIачкъала шагьрулул военкоматрал.
Укун чивчуну бур ванал наградной листрай:
1-мур роталул автоматчиктуран танкардащал душман бусса Подъяркув тIисса шяравалу дугьан багьлай бивкIун бур жула аьралуннан Львов шагьрулучIансса ххуллу тIитIин.
Шяраваллил зума-къирагъирай душманнал цIу тIиртIуну дур десантнащалсса жулла танкардайн. Му чIумал бахьттагьалтрал танкардая бувчIун, душманнайн гьужум бувну бур.
МахIаммадов Аьбдуллун душманнал автоматчиктурал группа хIисав хьуну, миннайн битлан ивкIун ур. 4 немец ивкIуну ур.
Немецнал ванал чулухуннай граната лирчуну, МахIаммадлул кIирагу каний ва лажиндараву щавурду дурну дур. Автоматран зарал хьуну, мугу пахъ багьну бур. Му чIумал МахIаммадов душманнайн ххявххун, закканттай иллан ивкIун ур. Кия каних мухIулттуцIа увгьуну кIункIу увну, урчIамуних куцциравух бишлай ивкIун ур. Немец ливхъун бавчуну бур. МахIаммадов хъирив лавну, ялагу бишлай улувкьуну ур. Мукун мунал 3 немецнацIухсса бувну бур.
ХIасил, 7 инсаннаясса немецнал кьюкьа МахIаммадовлул цалалу бат дурну дур.
МахIаммадовлул къучагъшиврул вайми аьралитуравун шавкь руртун дур. Ми циняв, душманнайн гьужум бувну, хьхьичIунмай бавчуну бур. Цала хьхьичI бивхьусса масъала аьралитурал багьайкун бартбивгьуну бур.
Ва ишираву ккаккан дурсса къучагъшиврухлу МахIаммадов Аьбдул лайкьссар ХIукуматрал яла бюхттулмур наградалун – Совет Союзрал Виричунал цIанин.
Командир Моторизованного батальона автоматчиков, гвардии капитан Бендриков
6 июль 1944 ш.
Командир 61 Гвардейской Танковой Свердловской Краснознаменной бригады, гвардии полковник Жуков
27 июль 1944 ш.
Командир 10 Гвардейского танкового Уральского добровольского корпуса, гвардии генерал-майор танковых войск Белов. 31 июль 1944 ш.
Командующий войсками ТА, Герой Советского Союза, гвардии генерал-полковник Лелюшенко
Член Военного Совета ТА, гвардии генерал-майор танковых войск Гуляев
Август 1944 г.
P.S. КIулну бур Аьбдулла МахIаммадов Мукьардал шяравасса ушиву. Ва ххаришивугу кIидачIлай, тавакъю буллай буру, оьрчIру, оьрчIал оьрчIру, гъан-маччасса бухьурча, оьвчияра ва номерданий:
8928 579 05 64.
