Хьурттал шяравасса Шайховхъал агьлу-авладраясса Апаннинал арс МахIаммадлул хъунмур оьрму Чачаннаву лавгун бур. Ванал нину-ппугу ва цувагу тийхва бувну, тийхва хъуни хьусса бур.

Дагъусттаннайн вайннал кулпат бивзун бур махъ, Чачаннаву дяъви байбивхьусса шиннардий. МахIаммадлул къуртал бувну бур Грознайливсса педуниверситетрал естественно-географический факультет.
Дуккин бюхъу бусса ва институтрал иширттаву чялишну гьуртту шайсса МахIаммад хьхьичIунсса студентътуравух ивкIун ур.
— Жул нину Ххадижат оьрус мазрал учительницая. Ва жул дуккаврил ялув хъинну дарцIуну дикIайва, чIявусса луттирду ккала­кки байвав, — тIий дакIнийн бутлай ур МахIаммад.
Институт къуртал бувну махъ 3 шинай ва зий ивкIун ур Старые Атаги тIисса Чачаннал шяравусса школалий учительну. Мичча лавгун ур аьралуннавун. Къуллугъ буллай ивкIун ур Венгриянаву.
Аьрали буржгу лавхъун, зана хьуну махъ МахIаммад зун ивкIун ур Грознайливсса №41 школалий. 1995 шинал ва школалул директор Чачаннал кIулшивуртту дулаврил министрну итайхту, директорнал къуллугъ МахIаммадлуйн тапшур бувну бур. Чачаннаву цалчинсса дяъви нанисса чIумал, цIусса властьрал чIявуми школардая лихъан буллай бивкIун бур цанма къакьамулсса учительтал, хаснува оьрус миллатралсса. МахIаммадлуллив ми циняв цалва школалийн бувцуну, салкьи бувну бур личIи-личIисса миллатирттал вакилтал бусса ххуйсса пишакартурал коллектив. МахIаммад хьуну ур школалий хьхьичIва-хьхьичI чак байсса къатта тIивтIусса директор. Мунийнугу кIулшивуртту дулаврил министрнал ва цайми къуллугъчитурал ваначIансса хIурмат ххишала хьуну бур. Ва цайми директортуран, цала чачаннан эбратну ккаккан уллай бивкIун бур. МахIаммад цувагу цалла даву лажин кIялану дуллалисса, марцIсса, тIайласса каялувчи ивкIун ур. Мунияту ва учительтурачIагу, дуклаки оьрчIачIагу хIурматрай ивкIун ур.
1995 шиная 1998 шинайннин ивкIун ур МахIаммад та №41-мур гимназиялий каялувшиву дуллай. Ва цуппагу шагьрулий цалчинсса гимназия бивкIун бур. Яла МахIаммад ивзун ур Дагъусттаннайн, Чачаннаву цалчинсса дяъви байбивхьусса чIумал МахIачкъалалив биян бувну бивкIсса цалва кулпатрачIан. Зун айивхьуну ур МахIачкъалаллал №17-мур школалий тарбиялул даврилсса буллалисса завучну. Шикку МахIаммадлул хъунма хIал къабувну бур. Ванал даврихсса гъирагу, бюхъу-бажаргу кIулсса МахIачкъалаллал №8-мур школалийсса физико-технический лицейрал директор Наземцев Григорий Ростиславовичлул ва цачIава зун увцуну ур. 2000 шиная шихунай МахIаммад Апанниевич микку зий ур. ЦIубутIуй – мува тарбиялул даврилсса буллалисса завучну, яла му штат лакьайхту – учительну. МахIаммад Апанниевич ур давриву цIушиннарду, дахханашивуртту дан хIарачат буллалисса, оьрчIан хIаз бизанмуних, миннан гъира бутанмуних луглагисса учитель. Ванал сипталий лицейраву ххуй-ххуйсса давурттив дунни. Масала, шинай цал (дуккаврил шин къуртал хъанахъисса чIумал) ххуллун кьини лицейраву дувайссар 7-11 классрал оьрчIру гьуртту хъана­хъисса кабинетирттал конкурс. Му конкурсгу хъинну хIазну лагай. Гьарица кабинет чIумуйсса шагьрулийн кIурабаяйссар, учительталлив шагьрурдал мэртал шайссар. Цумур дарсирал кабинет бурив, мунин лавхьхьуну цIагу дирзун, чIюлугу бувайссар. Масала, математикалул кабинет «Интегральск», физикалул – «Ампервиль», географиялул «Колумбус», литературалул – «Лит­роград» ва м.ц. Гихунмай дуклаки оьрчIая сакин дурсса командардал дянивсса бяст-ччал шайссар. Ва кьини аьдатравун дагьсса, учительтурангу, дуклаки оьрчIангу ххирасса, байрандалийн кIурадарсса кьини дур ва гимназиялуву.
МахIаммад Апанниевич цувагу сурат дишин бюхъу бусса ур. Школалул кьатIув ванал дувай личIи-личIисса рекламартту, афишарду, стендру, ляхъан дувай идарарттан­сса лишанну.
2000 шинал «Анжи» клубран цIусса логотип ляхъан дуллали­сса конкурсраву гьуртту хьуну, МахIаммад Апанниевичлул дурсса логотип язи дургьуну дур клубрал. 2010 шинал клубрал тавакъюрайн бувну му логотипрал цIусса вариантгу ляхъан дурну дур МахIаммадлул. Му лишан цIана футболистурал янналий дур.
Ххаллилсса педагог ва тарбиячи, ДР-лул лайкь хьусса учитель ва ларайсса категориялул учитель МахIаммад Апанниевич Шайховлун вай гьантрай оьрмулул 65 шин хьунни. Дустурал, мачча-гъаннал чулуха юбилейращал барча уллай, чIа тIий бура МахIаммад Апанниевичлун цIуллушиву, дуллалимуниву тIайлабацIу, кулпатраву нахIу-хIалимшиву. Ужагъраву рахIатшиву, гъилишиву ядуллалисса вила оьрмулул дус Беллащал оьрчIал оьрчIая ххари хъанай итаннав оьрмулул уччиннин.