Укунсса суал ва мунинсса жаваб дулару жу лях-карах
жулва кказитрай
Камил Давдиев, ДР-лул Миллатирттал арардал комитетрал каялувчи:
— Ларгсса нюжмар ттун дакIний лирчIунни Республикалул ХIукуматрал ва Дарбантуллал райондалул чулухасса делегациялущалсса Хачмаз шагьрулийнсса аьрххилийну. Му аьрххи бия ХIайдар Аьлиевлун 91 шин шаврин хас бувсса. Дагъусттаннал чулухасса делегация лахъа-хъунну хьунабавкьуна Хачмазуллал район дайдихьлахьисса кIанай, нукIу заманнул зумувну бувсса цIусса хъунисса къапурдачIа. Шинал мутталий ва райондалий дуллай диркIсса давурттив, ХIайдар Аьлиев увсса кьинилун хасну, шадлугърай кIицI лагайсса дия вайнначIа. Ва кьинигу шикку шагьрулувусса ца бульварданий тIиртIунни 7-мур аьсрулул кIинияз Джаванширин хас дурсса гьайкал ва художествалул галерея. ТIивтIунни мукунма гьарицимурцаннул щаллу бувсса ххаллилсса оьрчIал багъгу. Гьашину на азирбижаннал халкьунначIа мукьилчинна хъамалу хъанахъисса. Цимил гьарчангу на хIайран уллан икIара вайннал цалва тарих ххирашиврул, шагьрулул марцIшиврул, халкьуннал куннал куннащалсса иминшиврул, хъамаллурал хIурмат бушиврул. Ва аьрххилул агьаммур мурадгу бия Азирбижаннал ва Дарбантуллал райондалул халкьуннал дянивсса дусшиврул арарду цIакь даврин хас бувсса. Азирбижаннал та ца чIивисса шагьрулийгума дур цикссагу тарихрал гьайкаллу, музейрду. Тайннал ва жулла хIукуматирттал делегациярдащал жу ххал барду захIматсса дяъвилул шиннардий Дагъусттаннай зий ивкIсса Аьзиз Аьлиевлул ва цIанасса тайннал президент Ильхан Аьлиевлул цIанийсса ва цаймигу музейрду. Уку-укунсса аьрххирдайну умуд бур жулла республикалул шагьрулул ва райондалул хъуниминнал вайнначIа ххал хьусса хъин-хъинсса давурттив жучIарагу дуллансса эбратрансса хьунссар тIий.
Малика Кьурбанова, Дагъусттаннал Медициналул академиялул студентка (чачаннал миллатраясса):
— Ларгсса нюжмар дакIний лирчIунни Аргун шагьрулий, Рамзан Кьадировлул ниттил цIанийсса, ляличIисса, караматсса архитектура дусса мизит тIитIаврийну. Вара кьини тIивтIунни жучIа «Аргун-сити» тIисса хъинну исвагьисса, чил билаятирттай кунмасса ляличIину исвагьисса машлул ва цаймигу иширттал комплекс. ХIасил вай кIирагу идаралул жул шагьру хъиннува исвагьи буллай бур. Ва кьини жул шагьрулий дия унгу-унгусса халкьуннал байран. Чил билаятирттая тIайла хьуну, букъавкIсса хъамал бакъая жучIан. ЦIуну тIивтIусса мизитгу 15 000-нния ливчусса инсантал лагайсса, гьарта-гьарзашиву дусса бур. Ва бур хъаннил арамтурая личIину чак буллансса хIалу дусса, цимурца хIисавравун ларсун бувсса мизит. ХIасил, ва мизитрал караматшивруя буслай бусан къахьунссар, аьркинни шиккун бувкIун, цалва яруннин ккаккан. Мяйжаннугу, шивун увкIсса инсан, ляличIисса асардал увцIуну, игьалаган уллай ур. Ва мизитран цIа дирзсса Рамзан Кьадировлул нину Аймани Кьадирова жучIа хъинну хIурмат бусса хъамитайпар. ХъунмурчIин ва хъамитайпалул цIа мизитран дизавугу жул агьалинан ччай бия. Аймани Кьадировал Аьрасатнал Виричу АхIмад Кьадировлул цIанийсса ихIсандалул фондрай каялувшиву дуллай, Чачаннал респубкалул халкьуннал ахIвал-хIал хьхьичIунмай бавриву тамансса захIмат бувссар.
ХIадур бувссар Имара Саидовал
