Каспийскалий хьунни Ккуллал райондалийсса Ваччиял шяраваллил жяматрал Интнилхьхьунил байран.

Лакрал цаппарасса шяраваллил жяматирттачIа махъсса шиннардий сийлуву дур ца кIанайн бавтIун циняв Интнилхьхьунил байран дувай­сса аьдат. Мукун, мартрал 21-нний Каспийскалий «Престиж» цIанилусса банкетный залдануву хьунни Ккуллал райондалийсса Ваччиял шяраваллил жямат­рал Интнилхьхьунил байран. Мунийн, хъунмурчIин, бувкIун бия МахIачкъала ва Каспийск шагьрурдай ялапар хъанахъисса ваччи. Ваччиял жяматрал укунна, цинявппагу бавтIун, утти­гъаннунин дувайсса диркIун дур ЦIушиналмур байран. Интнилхьхьунилмур байрану хьунадакьин тIурча Ваччиял жямат кIилчинни батIлатIисса.
Бадрижамал Аьлиева
Укунсса батIавурттал ххуйшиву, яла-яла, дикIай шяраваллил жямат куннан кув цал ххишала ккаккан бюхъаву, цуппагу ва аварасса, куннан кув чIявуну къаккаккайсса, хъамалу гьан кIанай, сотовый телефоннавухва яхши-хаш бувну щаллу хъанахъисса заманнай. Ва кьинигу Ваччиял агьали, ца хъунмасса кулпат дуссухун бавтIсса кунма, яхши-хашрай, ихтилатир­ттай, балайрдах вичIидирхьуну, къавтIий махъатунин лахъи лавгунни залдануву.
Интнил байрандалущал бавтIми барча буллалисса махъру лавхъунни Ваччиял шяраваллил хIурмат бусса гражданин, профессор АхIмадов Сулайман Хановичлул, Ваччиял шяраваллил Хъунисриннал советрал председатель ХIусманов ХIусман Рамазановичлул, Гьарун Саэдовлул цIанийсса жяматийсса ихIсаниятрал организациялул хъунама Увайсов Давди Давдиевичлул, Ваччиял шяраваллил бусравсса цаймигу инсантурал ва хъамаллурал. Вайннал ихтилатругу, хъунмурчIин, бия цIуллу-сагъшиву, хъиншивуртту чIа тIисса. Буллалисса ихтилатирттал лях-карах хьунни буттал кIанттул тарихрацIун дархIусса, хаснурив Ваччиял шяраваллил лухччал, щаращал, бярдал цIардацIун дархIусса, «Вачи и вачинцы» цIанилусса викторина, хIазсса конкурсру, ихIсаниятрал лотерея. Буттал шяраваллил лагма-ялттусса лухччан цIарду, миннул тарих кIулми лайкь хьунни личIи-личIийсса бахшишир­ттан, лотереялуву тIайлабацIу хьуминнал дурххунни ичIура аьркин данмур, тIахIни-кIичIу тIий, цамур тIий.
Ва байрандалул хъунмур хъар цайнна ларсун дур Гьарун Саэдовлул цIанийсса фондрал, мунил каялувчи Увайсов Давдил, мунал хъиривчутал Исяев МахIаммадлул, Рамазанов Рашадлул ва цайминнал. Бартри, хьхьахьхьари, дукьрахIан ва цамургу дурну, миллатирттал дукрардал хъар цайнна ларсун дия, ХIусайнова ПатIиматлул ва МахIамаева Клавал каялувшиннаралу, Каспийскалий ялапар хъанахъисса Ваччиял хъаннил.
Ваччиял шяраваллил жяматрал чIарав бацIан, вайннал байран хъунна дуван бувкIун бия лакрал балайчитал Аьбдул Мурадов, Ульзана Макьсудова, Ямлихан ХIажиев, Зоя Гудова, Качарханум ва цаймигу.
ЧIараввасса «Каспий» банкетный залдануву КIилчинмур ЦIувкIуллал жяматгу бия вава укун Интнилхьхьунил байран дуллай. Вай кIирагу шяраваллил жямат ахирданий кунначIан кувгу бувххунни, цалла ххаришиву ва ссупра кIибачIиншиврулгу, карталий цачIу бакъахьурчагу, ва кьини куннал кув чIаххулну хьусса жяматирттащал.