Уттигъанну МахIачкъалалив, учительтурал магьиршиву гьаз дайсса институтраву хьунни «Первоцвет» цIанилусса, мюрщи классир­ттаву дуклакисса оьрчIал ахттаршиннардал проектирдал республикалул фестиваль. Микку хьхьичIунсса кIану бувгьуну, 2-мур даражалул диплом лавсунни Ккурккуллал школалул дуклаки оьрчIру ХIажиев Рамазаннул ва ХIусманова Кариматлул.

Андриана Аьбдуллаева
Ва фестивальданий гьуртту хьун бувкIун бия цинярда районнай ва шагьрурдай хьусса конкурсирдаву хьхьичIунсса кIанттурду бувгьусса дуклаки оьрчIру. Лакрал райондалул школардаву цалчинсса кIану бувгьуну бия Ккурккуллал школалий 3-мур классраву дуклакисса ХIажиев Рамазаннул ва ХIусманова Кариматлул хIадур дурсса проект­рал. Ми тIайла бувккун бия респуб­ликалул фестивальданийнгу. Проектирдаву ккаккан бувну бивкIссар 15 секция. Миннува цания ца язи бувгьуну хIадур хьун аьркинну бивкIссар дуклаки оьрчIан.
«История малой Родины» тIисса секция язи бувгьуну, «Куркли – родина моя» тIисса темалийсса ах­ттаршинна дурну дия Рамазаннул ва Кариматлул.
«История малой Родины» секциялуву гьуртту хьуну ур 23 дуклаки оьрчI. Укунсса даражалул фестивальданий, вайксса оьрчIаву жулла райондалул школалул оьрчIал хьхьичIунсса кIану бугьаву, му хъунмасса, пахру бан бучIисса ишри. Му ххувшаву ласун цалла оьрчIалгу, вайннащал зий бивкIсса учительтуралгу – проектрал каялувчи Миси Мажидовнал, оьрчIахь дарс дихьлахьисса ПатIима Хъуругълиевнал, ПатIимат Аьлиловнал ва Дианат ХIусмановнал хъуннасса даву дурну дур.
Республикалул фестивальданий тIалавшинна дусса жюрилул хьхьичI хъисвагу гьанавиххи къавхьуну, сивсуну цала буттал шяраваллия, шярава бувксса бусравсса инсантурая – дяъвилул ветерантурая, шаэртурая, личIи-личIисса элмурдал кандидатътурая ва доктортурая бувсунни Рамазаннул ва Кариматлул. Мукунма хъинну бюхханну бувккунни Аида Камаловал (ва, аьпа баннав, жунма хъама къабитайсса, хIурмат бусса Сияли ХIажиевнал душри) Ккурккуллаха чивчусса шеъри. Райондалул кIулшивуртту дулаврил управлениялул хьхьичIунсса кIану бувгьусса оьрчIру барчагу бувну, ХIурматрал грамотартту дуллунни. ОьрчIахь ва ми хIадур буллай бивкIсса учительтурахь дакIнийхтунусса барчаллагьгу увкуну, арцуйнусса бахшишру дунни школалул директор Даниял Магьдиевлулгу. ОьрчIал республикалул фестивальданий лавсъсса дипломругу, шадлугърал линейка дартIун, лахъа-хъунну буллунни.
Нагу дакIнийхтуну барча буллай бура жула школалул дуклаки оьрчIру ва учительтурал коллектив ва ирглийсса ххувшаврищал. Зул даража муниярвагу бюхттул хьуннав. Шяраваллилгу, райондалулгу цIа бюхттул дансса оьрчIру чIявусса букканнав зул учениктурава.
Манаба МахIаммадова, Дагъуст­таннал учительтурал магьиршиву гьаз дайсса институтрал жяматийсса ва гуманитар образованиялул кафедралул доцент, жюрилул член:
— Хъинну ххуй бивзунни Ккур­ккуллал школалия бувкIсса дуклаки оьрчIру. ЧIалай бия итххявхсса, гьунар бусса оьрчIру бушиву. Цала буттал шяраваллия хъуннасса ччаврищал, гьавасращал, хъинну бюхханну, гьарнан асар хьунну буслай бия. Вай гьарица чулуха шагьрулул школардал оьрчIаяр ялтту бувккунни. Ца чагъар ишла къабувну, цуппа цал бякъавкьуну, дакIних бувсунни чIявусса затру. Гъирарай вичIи дишав вайннал бусласимуних.