«ТНТ» каналданий мартрал дайдихьулия шиннай «Дружба народов» цIанилусса сериал ккаккан дуллай байбивхьунни. Ва хъанай дур ва каналданийсса цалчинсса сериал, цивугу миллатирттал дянивсса арарду ккаккан дуллалисса. Тамашачитурал хьхьичIун буклай бур Москавлив ялапар хъанахъисса ва зузисса Жабраил ва Лена Муслимовхъал интернационал кулпат: лас ур Дагъус­ттаннаясса лазгиричу, щарссагу — оьрус миллатраясса. Миннал бур арс ва душ. Муслимовхъал бур цивппа заллусса стоматологиялул клиника. Му сериалданул чIарах жувагу букканссияв, бургарча бурувгун, къабургарча — къабурувгун, «ТНТ» каналданий ккаккан дуллалисса чIярусса цаймигу сериаллал кунма, ванивух жулва Лак­рал театрданул актриса, ДР-лул лайкь хьусса артистка Саният Рамазанова гьурттуну къабивкIссания.

Бадрижамал Аьлиева
Ва сериалданул сценарийлул автор, режиссер-постановщик ур дагъусттанчу (лазгиричу), да­гъусттаннал тамашачитуран КВН-далийну кIулсса, «Махачкалинские бродяги» командалуву ивкIсса, махъсса шиннардий Москавлив зий ва ялапар хъанахъисса Шабан Муслимов ва оьрус миллатраясса мунал кулпат Нина Муслимова. Шабан Муслимов уттинингу цимирагу проектравух гьуртту хьуну ур: «Моя прекрасная няня» (СТС), «Счастливы вместе» (ТНТ), «Возвращение Мухтара» (РТР). Ва сериалданул автортурал бусаврийн бувну, ва сериалдануву хъанахъимунил сайки 90 % бусса бур вайннал цалва оьрмулувасса. Цалва геройтуран цалла фамилиягу дуллуну дур вайннал. Амма ва сериалдания къарязийсса дагъус­ттанлувталгу бур, шиву дагъусттаннал халкьуннал аьдатирттацIун, багьу-бизулуцIун даркьусса занакьулушин, къуццу-къуку бакъар, ялунгума дагъусттанлувтурал цIа кьюкьин дуллалисса кIанттурду, хъярч-махсартту бур тIий. ХIатта ДР-лул ПрезидентначIан чагъардугума чичлачисса бур, ва иширал хъирив лаяву дуван тавакъю буллалисса. Мяйжаннугу, дур шиву «пошлый юмор», хIатта миннуцIух цIу бусса, инсан цахва цува чулуха урган уллалисса хъярчру бунагу. Амма дюхъ дакъами хъярчирдаву ми бювкьунма лаглай бур. Ва щала кулпат лагма лавгун бургансса сериал дакъар, 16-нния ларайсса шинну хьуминнан тIий бухьурчагу. Ва сериалданул диялдакъашивурттавасса цану, ттул пикрилий, хъанай дур ва сериалданул агьамма геройнал – дагъусттанчунал роль дургьуну ур абхазчу, мунал гъан-маччаналсса – армяннал ва гуржиял. Дагъусттаннай цикссагу гьунар бусса артистал лякъинссия ми роллу дугьансса, «дагъусттанлувтал» армяннал ва гуржиял лугъатирттай гъалгъатIутIи къабувну.
Саният Рамазанова бакъасса, Дагъусттанная ялагу ва сериалданувух гьурттуну бур «зунттул хъачI» Халил Мусаев ва «ТНТ» каналданий «Комеди-клабравусса» гьурттушиннарайну машгьур хьусса «Да» дуэтрал жагьилтал.
«Дружба народов» сериалдануву Саният Рамазанова тамашачитуран ккаклай бур 11-мур «Цавар вашему дому» тIисса сериялуву. Муниву Саниятлул дургьуну бур Дагъусттанная бувкIсса Цавар тIисса лазгири хъамитайпалул роль. Цавар зий бур Муслимовхъал кулпатраву домработницану.
— ЧIявучил, хаснува хъаннил, цумур-дунугу ца каналданий дикIай цанна ххирасса, бургайсса сериал. Ттун ттуннарив сериаллу дурагу къаххирар, талихIиннараннив ягу хIайп учинссарив къакIулли. Хъинну ххирар кино цурда ва ттул хиял буссар, тархъансса чIун цахъи ххишала хьусса чIумал, щябивкIун, паракьатну ххал дуван хъунисса, цIанихсса режиссертурал ларсъсса ххаллилсса фильмру. Нара ххалдурсса махъра-махъсса сериаллив духьунссия ванияр 15-20-хъул шиннардил хьхьичIсса «Просто Мария» сериал. Мариял кунма хIаллурду бихьлайгума бикIайссияв, муниха лахьлай.
«Дружба народов» (ва сериалданун цал «Жабраиловхъул» тIисса цIагу дизлай буссия) сериалдануву гьуртту хьун ттуйнма оьвкусса хьхьичIппурттуву ттун цал цичIаввагу къабувчIуна. Цал ва сериалданулсса буллалими жулва театрданул каялувшиннарайн бувккун бия, нагу актертурал «база данныхлуву» лявкъуну. БувчIин бунни дугьан аьркиншиву Да­гъусттанная Москавлив Муслимовхъал ичIува зун бувкIсса, миннан цанмагу гъансса лазгири хъамитайпалул роль, миву на лазгири мазрайгу гъалгъа тIун аьркиншиву. «ТНТ» каналданий цукунсса сериаллу дикIайссарив бавсса на, тавакъю бувссия сценарий гьан дуван ттучIанна. Мукун, на кIул хьуссияв нара дугьан нанимур рольданущал. Эпизодралми роллу дугьлагьисса актертурачIан щалва сценарий гьангу къабайссар. ТIайламур бусан, цIана ттунма, шаппа му сериалданух буруглай, экрандалий ккаклакимур га чIумала кIулну бивкIссания, на бюхъайвав му сериалдануя махъунмай хьунгу, миву гьуртту къахьунгу. ХIатта му ахIмакьсса давуну хьурчагу, гьарцагу артистнан ччай бикIайну тIий аьрасатнал кинордаву эпизодралми роллурагу дугьан. Амма мивусса щала дюхъ дакъасса хъярчирдай ттун дакI къадакьлай дур, миву нава щала рязий къахьунсса, дагъусттанлувнацIун, цуппагу кулпатрал бакIчинацIун, къабавкьусса, кIанттурду бур.
Махъ му сериалданийнсса ттул «пробы» хьуна скайправух. Мукунмасса «пробы» му рольданийнсса цайми артисткахъащалгу хьуну бия, ахирданий на язи бувгьунав. Мукун, му серия ласласиссаксса хIаллай на Москавлив шамийлва левхссияв. Му сериал павильондалуву ласлай бия, му Бондарчуклул павильон дия, ва сериал ласласиминнал арендалий ларсъсса. Мивува къатри, декорациярду, дакъасса дакъая, гримертал, парикмахертал — цимурца лавайсса даражалий. Сериалдануву агьамми роллу дургьуну бия Екатерина Скулкина ва Таймураз Тания (абхаз). Миннащал уртакьшиврийсса зузаву хъинну ххуйсса хьунни, тя­хъасса, ххуйсса инсантал бия.
Ттун аьркинну бия оьрус мазрай лазгири лугъатрай ихтилат буллан, лазгири лугъатрал ялувгу зий буссияв. Амма миннан лазгири лугъатнияр лакралмур хIаз бивзуна. Мунияту лакку лугъатрайва ихтилат буллан пикри бувна. Ялагу аьркинну бия лазгири мазрай ихтилат буллангу. Хъинну хъунмасса захIмат хьуна лазгири мазрайсса гъалгъа лахьхьиннин, хасъсса экспертгума уссия ттул гъалгъалул ялув авцIусса. Утти телевизорданувух буруглагисса чIумал ттул лазгири мазрайсса ихтилат личIийну баллайвагу бакъая, мунил оьрус мазрайнсса таржумалуха. На мунил ялув мукссава захIмат къабувссаниягу бучIину бивкIун бур.
СахIналийсса ва сериалданувур давриясса суалданун жаваб дуллай, учинна — сериалданувумур даву дур сахIналиймурнияр бигьасса, рольданувун анаварну «бувххун» дувайсса. Театрдануву артистурал личIи-личIийсса периодру дикIайхьурча, «текстовый» тIий, «застольный» тIий, сериалдануву съемочный площадкалийва учаймур увкуну, ласаймур ларсун къуртал хъанай бур. Театрдануву жура дугьлагьисса рольданувун куртIну бувххун, му жувухра дуккан дурну, жула геройнал циняв асарду, пикрирду жулвами кунма кьамул буллай буру, ца спектакль бихьлай 3-4 барз хъанай бур. Шиккурив даву цурда чIирисса дакъанугу, му дуван чIирисса чIун харж дуллай бур.
«Дружба народов» сериалданувусса дюхъ дакъасса хъярчирдая тIурчаннив, ттун, муних буруглагисса цаймигу инсантуран кунма, даши къабизай ми. Жунма так ххуймуних, духIин думуних буруг­лан ччарчагу, «ТНТ» каналданул каялувшиннарал цамур пикри бухьунссия. «ТНТ» каналданийсса сериаллу хъунмурчIин укунсса дигу дикIай, мунияту на му каналданий ккаккан дуллалисса царагу кинорах, мукунна ва сериалданухгу, ттулва оьрчIру бурган къабитара. Оьрмулул хъунисса инсантураннив аькьлу-кIулши гьа хьунссар оьккимур ва ххуймур личIи бансса, хъинмунил ва къахъинмунил дяних дазу рищунсса. Ва сериалданух хъиннува буниялану буруглагавугу щала къатIайлахьунссар, вания дагъусттаннал кулпатраясса документальный ягу тарихийсса фильм дакъар, ва дур ситком, комедия. Ва журалул сериаллу — «ТНТ» каналданул формат дур. Ттулламур рольдануву ттун нигь-нач хьунсса цичIав дакъая, бивкIссания на навагу къарязий хьунтIиссияв, ласналгу къабитантIиссияв, мунияту рязийгу хьура, — буслай бур Саният.
ЧIа учинну Саният Рамазанован гихуннайгу творчествалуву хъуни-хъунисса хьхьичIуннайшивуртту, хъунисса роллу.