Гьашину Ккуллал райондалул муниципал сакиншиннарал къуллугъирттаву ялун чIалачIисса чIярусса дахханашивуртту хьунни. Администрациялул кIира-шанна отделданий пенсиялийн лавгминнахлу цIусса, жагьилсса, бюхъу ххисса каялувчитал бивтунни.
Миннувасса цану хьунни Ккуллал райондалул бакIчинал цала хъиривмурну битаву Илиясова Сабрина ХIажиявл душ. Буниялагу районнай, шагьрурдай хьуннав СССР дусса чIумал, компартиялул цала 1-ми секретартурал кIилчинма ягу шамилчинма секретарну хъамитайпа битайссия. Арамтурал «кIири бичайсса бакIру бя­къин» буваншиврул, гьай-гьай, къуллугъирттайгу чара бакъа вайннал чIарав хъами аьркиншиву оьрмулул чIявуну тасттикь бувай

Сабрина ХIажиявл душнил ва къуллугърайн лахъаннин­сса оьрмулул шачIантту укунсса бур. Ва бувну бур Хасаврай 1975-ку шинал. Ваччав 1992-ку шинал къуртал бувну бур школа. Гара шинал заочнайну бувххун бур МахIачкъалаллал финансово-экономический колледжравун. Бувххун бур даврийн Ккуллал райондалул сбербанкрал отделениялийн. Зугу зий, дугу дуклай, ванил колледж къуртал бувну бур 1996-ку шинал. 1997-2014-ку шиннардий зий бивкIун бур Ккуллал райондалул казначействалул доходиртталсса бувайсса отделениялий. 1999-ку шинал бувххун, 2005-ку шинал къуртал бувну бур, заочнайну ккалай, ДГУ-рал юридический факультет. Сабрина Илиясовал ва ванил ласнал Шамиллул дянив бур кIива душ ва ца арс. Ваниннин зий бивкIсса давур­ттай ванияту инсантал рязину ливчIун бур. Буллалисса ихтилат инсаннан къаччан къабикIанну, ганал тIутIимунихгу вичIи дирхьуну, цила къуллугърал бурж биттур бувавриятусса цIа ларгун дур райондалий. ХIазран бакъахьунссар 2007-ку шинал МахIачкъалалив хьусса «Семья года» конкурсраву вайннал кулпат ххув хьуну, «Самая интеллектуальная семья Кулинского района» тIисса хIурматрал цIанин лайкь хьусса.
Уттигъанну на хьунаавкьу­ссияв цIусса къуллугърай ванийн ци хъар дирну дурив кIул бувангу, лавгсса 3 зурул мутталий ванища дуван бювхъусса давурттаятугу цIуххаву дуван. Сабрина Илиясовал бувсуна ттухь укунсса затру:
— Ттуйн райондалул бакIчинал хъар бувну бур ялув бацIан, райондалул бакIчинащал щаллу буллан хъирив кIицI бувсса райондалийсса къуллугъру: маданиятрал, кIулшиву дулаврил, цIуллушиву дуруччаврил, социал хIаллихшиннардал идарартту, пенсионный фонд, почтарду, ЗАГС, Архиврал отдел, санитар службардал отделлу. Хъинну ххуйну най дур маданиятралми давурттив. ЦIусса шин хьунадакьаврия шиннай дуварду циняв байраннан хасъсса концертру, райондалий дакъа, шяраваллавугу, февральданул 15-нний Авгъаннава жула аьрал буккан бувсса кьинилун хас дурсса хьунабакьавуртту, 23-мур февральданул кьинилун хасъсса, 8-мур мартран хас дурсса. Дуварду «Ттул Дагъусттан» фестиваль. Интнилхьхьу хьунадакьарду. Вара кьини Маданиятрал шин тIитIаврин хас дурсса, такну гьарца шяраваллал цала-цала къушру, Досуговый центрданул фойераву тIивтIусса, маданият­рал зузалтрал хIадур дурсса концерт. Хьунабавкьура на, мукунма, райондалул агьалинал цIуллушиврул ялув бавцIусса хIакинтуращал, медсестрахъащал. Аьй-бювкьу дурссар вайннай цивппа зузисса идарарттал лагма марцIшиву къадуллай бушаврийн бувну, буржлув бувссар, субботникру дурну, марцIшиву дуван. Агьамсса масъалалун хасъсса батIаву хьунни Санэпидемиологиялул зузалтращал. Шикку гьаз хьунни шяраваллаву, райондалий хьуннав къатта-къушлива ду­ккайсса марцI-чапалшиву (ТБО) дичлансса, гайннул утилизация дувансса, лагма чапаргу дусса полигон Ваччав аьркинну бушиву, шяраваллаву инфекциялул цIуцIавуртту ялун къаличиншиврул, шяраваллая архну, Ветуправлениялул ккаккан бувсса кьяйдалий, скотомогильникру бикIан багьлай бушиву. Шяраваллавусса заллу-зал акъасса ккаччив инсантурайн къаххяхланшиврул, вайннул цIуцIавуртту ппив къадулланшиврул, бухлаган буван багьлай бушиву.
Агьамсса давуну хъанан дикIай дуккаврил шинал ахирданий дулайсса ЕГЭ дулаву. Мунийн бувну, школардал вив, райондалий дуллай буссар предметирттал хасъсса олимпиадарду, конкурсру. Мартрал 22-нний Ккуллал 2-мур школалий дур­ссар пробный ЕГЭ. Шикку гьуртту хьуссар сайки циняв гьашину школарду къуртал буллалисса дуклаки оьрчIру.
Жулла зунттал райондалий­сса масъалартту анаварну биттур буван къашайсса бикIай. Мунийн бувну, ттунгу ттулла цIусса давриву чIявуну инсантурал аьра­тталшиву лагь дуллан багьай.
— Ина дуллалимуницIун Аллагьналгу кабакьиннав.