2002 шиная шихунмай Лакрал райондалий аьдатравун багьну бур интеллектуал тIуркIу «Брейн-ринг». Мунил сакиншинначитал бур райондалул администрациялул ОьрчIащалсса ва жагьилтуращалсса даврил ва туризмалул отдел, КIулшиву дулаврил управление ва магьирлугърал къа­тта. Лакрал райондалул «Гъази-Гъумучи» команда гьарца шинал гьуртту шайссар республикалул тIуркIулийгу.

«Брейн-ринг» тIуркIулул сий райондалий ялу-ялун хъунна хъанай дур. Уттигъанну Гъумучиял клубраву хьунни райондалул щархъал дянивсса тIуркIу. Муний гьуртту хьунни жагьилтурая ва бугьараминная сакин хьусса 8 команда.
ТIуркIулул хIасиллайн бувну, цалчинмур кIану бувгьунни ЧIарттал командалул, кIилчинмур кIану – Кьубиял командалул, шамилчинмур кIану – Хъунайннал командалул. ХьхьичIунми тIуркIучитал хьунни: К. АхIмадов ва З. ХIажимирзаев (ЧIарттал командалувасса); М. Аьлибагова (Кьубиял командалувасса); И. Аьшаев (Хъунайннал командалувасса).
Ххув хьуминнан буллунни дипломру ва арцуйнусса бахшишру.