Шиная шинайн жулла республикалийн букIлакIисса Аьрасатнавух ва щалла дунияллийх цIа ларгсса артистурал, балайчитурал, музыкантътурал ккал хъунна хъанай дур. Ларгсса нюжмардийгу жулла республикалийн, МахIачкъалалив, бувкIунни аьрасатнал цIанихсса пианистка, Москавуллал паччахIлугърал консерваториялул преподаватель Екатерина Мечетина.
Бадрижамал Аьлиева
МахIачкъалалив бувкIсса пианисткан апрельданул 10-мур кьини дия ххишала дакъа хьунабакьавурттал, иширттал авадансса. Мукун, му кьини Екатерина Мечетинащалсса хьунабакьаву цал хьунни ДР-лул Культуралул министерствалуву. Машгьурсса пианисткащал хьунабавкьунни ДР-лул культуралул министр Зарема Буттаева, мунил хъиривчу, Республикалул Халкьуннал творчествалул къатлул директор Марита МухIадова, МахIачкъала шагьрулул администрациялул Культуралул управлениялул начальник Фарид Абалаев. Ва хьунабакьаврий Зарема Ажуевнал увкунни:
— На хъинну ххарира махъппурттуву Дагъусттаннайн, хъунмасса гъираращал, дунияллул цIа дусса культуралул ва искусствалул ишккаккулт, деятельтал букIлай бушиврия. Республикалийнсса аьрххилия махъгу цалва асарду цайминнащалгу кIибачIлачIаврия. Жул тамашачитуран хъинну ххирассар классикалул музыка ва жу хъинну ххариру фортепианолийсса вил ххаллилсса тIуркIулух вичIидишинсса каши жучIарагу шаврия, — куну.
Екатерина Мечетинал барчаллагь увкунни цуппа укун гъилину, ххуйну кьамул баврия ва бувсунни гихуннайсса цилла программалия, кIицI лавгунни цуппа аьрххилий чун гьарчагу, хъуни шагьрурдайн ягу аьрасатнал га яла «къюкIмур» шяравун, тамашачитурахь бусайшиву цилва щаллу буллантIисса музыкалия, Дагъусттаннай ккаккан дан нанимур концертрайгу цилва щаллу бантIишиву палангнал композитор-импрессионист Морис Равеллул ва жула цIанихсса пианист, композитор Сергей Рахманиновлул произведенияртту. Хъирив Екатерина Мечетинащалсса хьунабакьаву хьунни МахIачкъала шагьрулул администрациялуву. Мунивух гьуртту хьунни шагьрулул бакIчинал хъиривчунал буржру чIумуйну биттур буллалисса Татьяна Гамалей, лавайгу кIицI лавгсса Марита МухIадова ва Фарид Абалаев. Цилва ихтилатраву Татьяна Владимировнал кIицI лавгунни МахIачкъала шагьрулул дурсса махъсса шиннардил ца ккаккиялун ккалли дуван бучIишиву шиккун машгьурсса артистал, театрдал коллективру, классикалул музыка щаллу буллалисса усттартал букIлакIаву. Екатерина Мечетиналгу цилвамур ихтилатраву чIурчIав дунни цуппа хъинну ххарину бушиву МахIачкъалаливсса аьрххилия, цинма ххирашиву жулва билаятрал ца мурцIния, гамунийн бияннин аьрххирдай буклан. Мяйжаннугу, Екатеринал ца шинал дянив щалвагу билаятрал личIи-личIисса шагьрурдай дулайсса дур 60-ннийн дирссаксса концертру, концертирттащал бивну бур дунияллул 40-ллихъайсса билаятирттайн. Ва гастроллай занай бур сольный концертирттащал ва «Виртуозы Москвылул» солисткану, мукунма Аьрасатнал Миллатрал филармониялул оркестрданущал, Аьрасатнал миллатрал оркестрданущал. ХьхьичIва-хьхьичI сахIналийн Екатерина бувккун бур цилва оьрмулул 5 шинаву. АцIра шинаву тIурча Центральный музыкалул школалий дуллуну дур цалчинсса циллалусса концерт. Мува чIумал лайкь хьуну бур Вероннай хьусса «Премия Моцарта» конкурсрал Гран-приран. Оьрмулул 13 шинаву Москавлив хьусса чIава пианистурал Ф. Шопеннул цIанийсса конкурсрай кIилчинмур премиялул лауреат хьуну бур. Мукун, гиччава най бунасса хъунмасса гьунарданул, бюхъулул заллу бур Екатерина Мечетина.
Шагьрулул администрациялувумур хьунабакьавугу хьунни дакIнийхтунусса, тIааьнсса. Татьяна Владимировнал хъамалу душнин хъамакъабитулунсса бахшишругу дуллунни. Екатерина Мечетиналгу бахшишран кьадиртунни цилва щаллу буллалисса музыка бусса диск.
Хъирив Екатерина Мечетина бивунни Г. ХIасановлул цIанийсса Музыкалул училищалувун. Миву ссавур дакъа ваних ялугьлай бия зал бувцIусса преподавательтал ва студентътал. Музыкалул училищалуву Екатеринал ккаккан бунни мастер-класс. Му училищалул кIива студенткан ххишала бакъа тIайлабацIу хьунни цIанихсса пианисткал хьхьичI цалвами гьунарду ккаккан бансса, мунил цаяра дуллалисса цIардах вичIидишин ва цалла диялдакъашивурттаясса ихтилатирттах личIлулну вичIидирхьуну, Екатерина Мечетинал чулухасса багьа бищун къашайсса маслихIатирттах къулагъас дувансса.
Мура кьини ахттакьун чIумал Къумукьнал театрдануву Екатерина Мечетинал ккаккан дунни ххаллилсса концерт. Ва хьунни классикалул музыка ххираминнансса багьа бищун къашайсса бахшиш. Жулва тамашачитал муксса личIлулну вичIидирхьуну бияхха ванил бишлашисса музыкалух, хъугьу бахчуманан залданувагума уккан багьлай бия, залдануву хьусса ваксса-таксса чIугу лахъну баллай бия.
Укунсса хьунни, МахIачкъала шагьрулул администрациялул ва ДР-лул Культуралул министерствалул оьвкуну бувкIсса, Екатерина Мечетинал Дагъусттаннайнсса аьрххи, ванин цинмагу, ванищал хьунабавкьуминнангу оьрмулухун дакIний личIансса.
