Медициналул зузалал кьинилул хьунийн Лакрал райондалул больницалий хъунама хIакин АьбдурахIим Дибировлул зузалт барчагу бувну, технический зузалтрая тIайла хьуну, медсестрахъайн, хIакинтурайн бияннин – 30 зузалан дуллунни арцуйну­сса бахшишру. «Дагъусттаннал цIуллу-сагъшиву дуруччаврил отличник» тIисса лишан дуллуну дур Жяъпарова Закиратлун, Оьма­рова Саратлун, Катаева Саидан, Оьмарова СултанпатIиматлун, Эфендиева Марижатлун.

Шанма-мукьва зурул хьхьичI Лакрал райондалул больницалул хъунама хIакин АьбдурахIим Дибировлущал бувссия гьарта-гьарзасса ихтилат. Байрандалул хьунийн барду тания мукьах хьу­сса дахханашивурттаягу цIухху-бусу. Ванал бусласимунийн бувну, хъунмур буруккиннува личIлай бур больницалул къатри къумасса душиву, хIакинтурансса кабинет­ру биялну бакъашиву, шартIру дакъашиву. ХьхьичIрасса налоговый инспекциялул къатраву кIива къатта буллуну бур ца «Анаварсса кумаграл» шофертуран, цагу — бухгалтериялун. Шиккува дакIнийн бутан, ларгсса шинал больницалий цIу дурссар санузел, дурцуссар гъилисса ва дяркъусса щин, кIирагу зивулий дирхьуссар раковинарду. Уттигу дакIний бур ремонт дан. «ЦIусса больницалийн бизансса хиялгу 10 шинававагу бартлаганхьуви тIисса умудрай буру», — тIий ур хъунама хIакин.
Ларгсса шинал ялагу больницалийн увкIссар 5-6 цIусса жагьилсса хIакин. Вана ттигъаннугу, АьбдурахIим Дибировичлул тавакъюрайн бувну, больницалий зун бувкIун бур: Республикалул хъунмур больницалий оргметод отделданул хъунаману, медакадемиялул цIуллу-сагъшиву дуруччаву сакин даврил кафедралий зий ивкIсса, даврил биялсса опыт бу­сса пишакар Умахан СалихIович; жагьилсса стоматолог Рустам Магьдиев. Вай гьантрай бувкIунни ххуйсса ккаккиярттащал Да­гъусттаннал медакадемия, Москавлив– «Центр планирования семьи» медициналул центрданий цIанихсса гинеколог Галина Савельевал кафедралий ординатура, хъуншагьрулул цалчинмур больницалул гьанулийсса аспирантура къуртал бувну, 5-мур ва 11-мур роддомирттай зий, жагьилсса бунугу, даврил биялсса опыт бусса хIакин Аминтаева Лиана.
Буллай бусса бур хьхьичIва къабуллай бивкIсса операциярду — сситтучIикIрай, туннурдай. Ттигъанну операция бувну бур сукку хьун къахъанай бивкIсса Ваччатусса хъамитайпалул тромбалий.
КIинттул ппив хъанай дайдирхьусса мусикъеп духлаган дурну дур.
Гъинттул чIумал ппив хъанан дачайсса дур ущу-щулгъилия лахъайсса азарду — молярия, личIи-личIисса журалул (египетский, тропический, ближневосточный) лихорадка ва му бакъассагу, гъинттул лага-бучIайминнал мичча-тичча ларсун бучIайсса азарду. Миха-тиха бигьалаган бувкIсса инсантурал ялув авцIуну ур эпидемиолог Абакаров Шамил. Цукунсса-дунугу азар ппив хьусса кIанттая увкIсса инсан хъинну хъирив лавну ххал аннин карантин бишайсса бусса бур.
Ттигъанну Республикалул Хъун больницалия ва цаймигу идарар­ттая бувкIсса комиссиялул ххал бувну бур Ххюлуссуннал, Щардал, Хъурхърал, Буршиял ФАП-ру. Бувну бур методический кумаг. Ми ФАП-ирдал хъунмур буруккин бур ттизаманнул тIалавшиннардацIун къабавкьусса бушиву.
Больницалий тIивтIуну бур ФАП-ирдал даву ххалдигьлансса оргметод кабинет. ШавкIуллал ФАП-рал хъунмур Жаннат ХIасановна хIурматрай пенсиялийн тIайла бувккун, кьамул бувну бур цIусса зузала.