МахIачкъалаллал Кировуллал райондалул администрациялул зузалтращал кIул унни цIуну ивтсса администрациялул каялувчинал кIанайма СалихI Сагидов. Уттинин ва зий ивкIссар Ккуллал райондалул бакIчинал хъиривчуну.
ХI. Аьдилов
ЦIусса каялувчи ккаккан уллай, МахIачкъала шагьрулул администрациялул бакIчинал хъиривчу Абусупиян ХIасановлул барчаллагь увкунни уттигъанну хушрай цала къуллугъ кьабивтсса АхIмад Нахаев бакIчисса Кировуллал администрациялул зузалтрахь, уттинин дурсса давурттахлу. Ганал бувсунни дакI дарцIуну ушиву, СалихI Сагидовлул каялувшиврулу биттур булланшиврий МахIачкъалаллал администрациялул бакIчинал кIанайма МахIаммад Сулаймановлул райондалул хьхьичI бивхьусса масъалартту.
СалихI Сагидовлул барчаллагь увкунни шагьрулул бакIчитурахь ва МахIачкъалаллал администрациялул бакIчи МахIаммад Сулаймановлухь, цайнна вихшала даврихлу, ва бакIрайн лавсунни лажин кIялану биттур буллан цалва къуллугърал буржру, агьалинащал хIала-гьурттуну щаллу буллан райондалул хьхьичIсса масъалартту.
