Матрал 27-нний Москавлив Аьрасатнал Президентнал Администрациялул конференц-залдануву хьусса, «Взгляд женщин на острые проблемы современности» цIанилусса, щалагу дунияллул халкьуннал хъаннил конгрессравух гьуртту хьуну зана хьунни «Дараччи» клубрал президент Илиясова Мариян ЧIибиевнагу.
Бадрижамал Аьлиева
Ва конгресс бувну бур «Женщины нашего города» РОО-лул ва «Лидеры мирового сообщества» цIанилусса дунияллул халкьуннал дянивсса жяматийсса организациярдал союзрал.
Ва конгрессрал лагрулуву хьуну дур халкьуннал дянивсса тIиртIусса «Россия — территория мира» цIанилусса плакатрал конкурсраву ва графикалул ва живописьрал давурттал «Россия — твоими глазами» конкурсраву ххув хьуминнал давурттал выставкалул презентациягу, миннан бахшишру дуллалисса батIавугу.
КIулсса куццуй, ларгсса шинал Мариян ЧIибиевна лайкь хьуссия дунияллул халкьуннал дянивсса «Серебряный голубь» премиялун (знак общественного признания). Гьарца шинал, Жяматийсса наградарттал советрал хIукмулийн бувну, му премиялун лайкь хъанай бур Аьрасатнал, Украиннал, Молдованал, Японнал, Польшанал, Индиянал, ЦачIунхьу Эмиратирттал ва цаймигу билаятирттал жяматийсса ишккаккулт. Мукун, 2014 шиналми номинантътуран «Серебряный голубь» премия дуллалисса шадлугъравухгу гьуртту хьунни Мариян ЧIибиевна.
Му премия дуллалисса шадлугъ хьуну, хъиривмур кьини хьуну бур цуппа конгресс «Взгляд женщин на острые проблемы современности». Микку докладру бувну бур дунияллул личIи-личIисса билаятирттаясса хъаннил, гьаз бувну бур цIанасса чIумул яла цIурувкьюми масъалартту. Мариян Илиясовал бувну бур «С гордостью и болью за Дагестан» цIанилусса доклад. Миву Мариян ЧIибиевна дунияллул билаятирттал вакилтурахь буслай бур цуксса караматсса, ххаллилсса билаят буссарив Дагъусттан, мунил дахханасса тIабиаьтрая, халкьуннал касмурдая, пишардая, аьдатирттая ва багьу-бизулия, мунил тарихрая, 1999 шинал республикалий хьусса иширттая, махъсса шиннардий республикалий личIлачIисса паракьат дакъасса тагьардания, цилгу къабитлатисса ва ххаллилсса билаятрал халкь ттуршукурдай щаллу хъанай бивкIсса тарихран, культуралун, аьдатирттан лавхьхьуну-лайкьну оьрму бутлан. Докладрая махъ Мариян ЧIибиевначIан гъан хъанай бивкIун бур чил хIукуматирттаясса хъами, цIухху-бусу буллай, мукунма Москавлив цикссагу шиннардий ялапар хъанахъисса Дагъусттаннаясса душру, мукунма оьрус душру «жу Дагъусттаннайн бивссару, Къизлардай, Дарбантлив хъатIий буссияв» тIий буслай.
Ахирданий кьамул дурну дур IV Халкьуннал дянивсса хъаннил конгрессрал резолюция, цивугу бусласисса цив, дунияллул билаятирттал хъами, миллатирттал аьдатру, мазру, багьу-бизу буруччаврил чулух бушиву, къаршину бушиву миллатрал ва диндалул экстремизмалийн, душманшиврийн, зид-къащилийн, конгрессрайн бавтIсса хъами — ниттихъул, кулпатру, ссурвал, душру, цалва мурадиран ккалли буллай бушиву дунияллий дакьаву дуруччаву, цан къаччишиву, къакьамулшиву щил-дунугу политикалул амбициярдал цIаний дунияллийсса цаягу инсан ивкIуну, щин-бунугу зарал хьуну, мунияту цивппа ццаххандаращал хъирив бавцIуну бушиву Иракьнаву, Ливиянаву, Сириянаву, Украиннай ва цаймигу кIанттурдай хъанахъисса иширттал. Дакьаву, миллатру буруччаву, инсан язими аьдатирттал зумувну тарбия аву, халкьуннал культура дуруччаву ва авадан даву чIалай бур вай хъаннин хIакьинусса агьамми масъаларттуну. Оьвчаву дуллай бур хIукуматирттайн шайссаксса чIявусса хъами битлан хIукуматрал ва жяматийсса давурттай, регионнай ва кIантту-кIанттурдай.
Ялагу дакI ххари дуллай дур Дагъусттаннал цIа вакссара къанахIусса, му кьюнуравух дукканмуних луглагисса заманнай, «Лидеры Мирового Сообщества» журналданий Мариян ЧIибиевнал суратгу, муниясса чичрурдугу душиврулгу. Москавлив буклакисса «Женщины нашего города» тIисса кказитрай тIурча Мариян Илиясоваясса макьала дур, бувсун бур ванил даврия.
