Москавуллал паччахIлугърал машиностроительный университетрал МахIачкъалаливсса филиалданул директор, ЦIуликъяннал шяравасса КьурбанмахIаммад КьурбанмахIаммадовлул цIа республикалий бусравминнавух кIицI лагай. Цува зузисса институтравугу КьурбанмахIаммад ДинмахIаммадович хIурматрай ур коллегахъачIа ва студентътурачIа. Мукун бусрав хьунсса хасиятругу ванаву чансса дакъар.

Андриана Аьбдуллаева
КьурбанмахIаммад ур инсаннал дакIниймур лаласун кIулсса, аьркин багьний кумаг бан, чIарав ацIан чялишсса адамина. Ва ур кIулшивуртту дусса преподаватель, гьунар бусса каялувчи. Ци даву бакIрайн ласурчагу, му лажин кIялану бартдигьин хIарачат байсса инсан. Яла-яла, ва ур миллат ххирасса, лакрал чIарав ацIан ччисса адамина. Мукун буслан бикIай цал бунугу ванащал хьунабавкьусса инсантал.
Давриву чIалачIи дур­сса ххуй­сса ккаккиярттахлу КьурбанмахIаммад Динма­хIам­мадович лайкь хьуну ур личIи-личIисса бахшишир­ттан ва бусравсса цIардан. Ва хIакьинусса даражалийн иян КьурбанмахIаммадлун лахъи­сса, бигьа бакъасса ххуллу битан багьну бур. Амма оьрмулуву хьунабавкьусса личIи-личIисса иширттаву ванаща цала хIал ккаккан бан бювхъуну бур.
Школагу къуртал бувну, 1971 шинал КьурбанмахIаммад ув­ххун ур Рязаннал радиотехникалул институтрал вычислительный техникалул факультетрайн, архIала Рязаннал комбайннал заводрайгу зий. Амма ванал зузаву тачIав дуккаврихун къадахчайсса диркIун дур.
Ххуйну дуклай тIий ванал сурат мудангу факультетрал ХIурматрал улттуйн лархъун дикIайсса диркIун дур, институтрал каялувчитуралгу ххуйсса студентнан цимилагу барчаллагь баян бувну бур. 1977 шинал институт къуртал бувну махъ КьурбанмахIаммад Коломна шагьрулийсса машиностроениялул Конструктортурал бюрорай конструкторну зун тIайла ув­ккун ур.
1978 шинал ва зун ивкIун ур Дагъусттаннал политехнический институтрал автоматикалул ва телемеханикалул кафедралий, цал лабораториялул заведующийну, чIивима элмийсса зузалану, яла хъунама элмийсса зузалал къуллугърай. КьурбанмахIаммадлул бюхъу-бажар чIалай, институтрава ва тIайла увккун ур Н.Э. Бауманнул цIанийсса Москавуллал лавайсса даражалул техникалул училищалул аспирантуралуву дуклан. Аспирантуралувугу КьурбанмахIаммад хьхьичIунну дуклай ивкIун ур, гьуртту шай­сса ивкIун ур жяматийсса давурттавух. Ми шиннардий ва зий ивкIун ур Москавуллал Бауманский райондалул избирательтурал комиссиялул штабраву.
Цила кIанайн дуртун ххуйну даву дуллай тIий, училищалул ректорнал ванан цимилагу барчаллагь баян бувну бур. 1985 шинал лайкьну диссертациягу дурурччуну, КьурбанмахIаммад ДинмахIаммадович зун ивтун ур Дагъусттаннал педагогтурал институтраву кафедралул хъунама преподавательну.
1992 шинал ванан дуллуну дур ДГПИ-лул информатикалул ва вычислительный техникалул кафедралул доцентнал цIа. Шиккугу КьурбанмахIаммадлул ккаккан бувну бур цалла пишакаршиврул даража.
2002 шинал МахIачкъалалив Москавуллал тIивтIу университетрал филиал зузи байхту, КьурбанмахIаммад ва филиалданул директорну ивтун ур, миккува ца кафедралул профе­ссорнугу увчIуну.
МахIачкъалалив ва филиал тIитIаврил сиптачиталну був­ккун бур ДР-лул ХIукумат ва Халкьуннал Мажлис. Дахьва зун байбивхьусса филиалдануву чIярусса сакиншиннарал давур­ттив дуллай, хъунмасса захIмат бивхьуну бур КьурбанмахIаммад ДинмахIаммадовичлул. Мунал хIарачатрайгу щаллу хьуну бур документирттал ва юридический дузалшиннарал масъалар­тту. Институт зун бикIайхтува кьамул буллан бивкIун бур кIива журалул пиша лахьхьинсса студентътал. Махъ тIивтIуну бур цайми пишарду лахьхьинсса отделениярттугу.
ЦIанасса чIумал Кьур­бан­махIаммад ДинмахIам­мадович каялувшиву дуллалисса ВУЗ-райн Москавуллал паччахIлугърал машиностроениялул университет учай. Ши­кку зий бур 180 преподаватель, зувинния ливчусса укунмасса зузалт. Очнайну ва заочнайну дуклай ур 2000 студент.
КьурбанмахIаммадлул хIара­чатрайну дузал хьуну бур институт аьркинсса техникалул ва кьай-кьуйлулгу, дурну дур дарсирдансса ва лабораториялул занятиярдансса цIусса къатригу. Ва къуллугърай уссаксса шиннардийгу ялун лирчуну дур КьурбанмахIаммадлул инсаннаха аякьа дайсса, цаманал тагьар дурчIайсса, мюхтажнал чIарав ацIан ччисса хасиятру.
Ванал сипталий институтраву куклушинна дурну дур Бущи­хъиял, ЦIуссалакрал, Буйнакс­каллал райондалийсса дяъвилул иширттаву зарал бивсса нитти-буттал оьрчIан. Мукунма ду­ккавриву кумаг байсса бур аьра­литурал ва ихтиярду дуруччай органнал зузалтрал оьрчIан. Му бакъассагу, КьурбанмахIаммад ДинмахIаммадовичлул каялувшиннаралу институтраву тIайла дурккун дур хъуннасса агьамшиву дусса, машгьурсса инсантуран хас дурсса элмийсса конференцияртту. ХIакьинусса кьинигу шикку лагайсса дур дунияллул, региондалул, республикалул даражалийсса элмийсса конференциярду. Институтрал студентътал гьуртту шайсса бур личIи-личIисса спортрал ва кIулшивурттал бяст-ччаллаву, жагьилтурал мероприятиярттаву ва акциярдаву.
Ми гьарзатрал ялув авцIуну ур цалла даву ххирасса ва ххуйну кIулсса КьурбанмахIаммад ДинмахIаммадович. Ванал итадаркьуну дур 100-нния лирчусса элмийсса давурттив, личIи-личIисса монографияртту ва пособияртту.
КIулшиву дулаврил аралуву бивхьусса захIматрахлу ванан дуллуну дур «Почетный работник высшего профессионального образования РФ», «Заслуженный работник образования РФ» тIисса бусравсса цIарду.
КьурбанмахIаммад ур Аьра­сатнал Инженертурал сакиншиннарал ва Оьруснал географиялул обществалул Ассоциациялул член.
Уттигъаннурив ванан дуллунни «За трудовое отличие» тIисса Чачаннал республикалул ХIурматрал лишан. Ва лайкьсса наградалущалгу барча уллай, чIа тIий буру ва ххаллилсса ла­ккучунан оьрмулуву ва давриву тIайлабацIу. Ина гьар мудангу бивзний ша бакьлай, увкуний махъ бацIлай личIаннав хIурмат бусса, КьурбанмахIаммад Дин­махIаммадович!