Вил ялув баргъгу чаннар,
ЦIурттал цIайгу ягинни,
Бургъил тIинттал вил дара,
ЛичIинура гъили дай.
Вай ххару чивчуссар тарихрал учитель, цувгу жагьилну уна аьпалухьхьун лавгсса, Оьмаев Мустапа ХIасановичлул.
Гьашину Хъювхъиял щаллу бакъа дянивмур даражалул школалун хъанай дур 90 шин. Ттун чичин ччай бур жула школалул тарихрая, къакIулнангу кIул бан, кIулнангу дакIнийн бутан, хаснува махъа нанисса никиран кIулну бикIан, цанчирча ва дунияллийсса циняв пишардал гьану школалий бизайсса буну тIий. Яла захIматмур пишагу, ттул пикрилий, учительналмур пиша бур. Учитель цува оьрмулухун дуклайна ур. Цалвами оьрчIру хъуни бувну, мяърипат дуллуну, дуккин бувну махъгу, цува зузиссаксса хIаллай цайминналми оьрчIругу мува куццуй тарбия буллай ур. Учитель ур чIярусса элмурду кIулма, му ур артист, му ур хIакин, хъярч-махсарачи, оьрчIал кIилчинсса нину-ппу. Миксса пишардаягу бизар къавхьуну, зий, хIарачат буллай ур, шаймур буллай ур, цалла даврил кьимат бакъанугу, оьрчIан за лахьхьаву мурадрай, ганая инсан хьуну, оьрмулуву цала ххуллу бувгьуну, буттал буттахъан лайкьну яхъананшиврул. Гьарца школардал бур цалва-цалва чIиви-хъунсса тарих. Жул школалулгу бур, цуппа чIивинугу, биялсса тарих. Махъсса шиннардий Хъювхъиял шяравалу бюхттул дунни тарихрал элмурдал доктор, профессор МахIаммадов МахIач АхIмадил арснал, балайчи АхIмад АхIмадовлул, «Форема»матахI мебеллу дай фирмалул генерал директор Кьаллаев Оьмарил, художник Кьаллаев Бунияминнул, Ккуллал райондалул администрациялул бакIчи Сулайманов Сяид ХIасниевичлул ва мукунма цайминналгу. УкунминнацIа хъунмасса пахру буссар жул школалун, щарнил жяматран, цанчирча вайгу дуклай бивкIун тIий Хъювхъиял школалий. Вайннаятугу, цайми шикку зий бивкIминнаягу чичинтIиссар вания тихунмайгу. Цалсса на чичлай бура школа тIивтIуния шихунмайсса тарих.
ХIакьинусса кьининин зий ур жул школалий директорну 55 шин дурсса Сулайманов Халилуллагь Сяидович, 12 учительгу, техзузалтгу. Школалул юбилей дан хIадур хъанай буру циняв. Шикку зий бивкIсса, зий бивкIми кIулсса, гьурттушинна дан ччисса цинявннахь тавакъюри жущал хIала буххаву, жущал дахIаву даву. Чивчумуниву агана чIиви-хъунсса гъалатI хьунабакьирча, тавакъюри багъишла битаву, гъалатI тIайла бацIан баву.
Жул школалий зий бивкIун бур Ккуллал райондалул шяраваллавасса чIявусса учительтал, миннаяту бивкIун бур чIявусса директорталнугу, бивкIун бур оьрус учительталгу. Минная бавсса, кIулсса ухьурчагу, хъунмасса умуд буссар, кказитрайхчин ягу школалийн бувкIун баян баву. ЦIанава баян буллай буру хъунмасса барчаллагь.
КIулшиврул тарих
Октябрь социалист революция хьуну махъ мархлуцIакул баххана хьуссар Хъювхъиял шяраваллил агьалинал оьрму. 1924 шинал тIивтIуссар школа. ХьхьичIа-хьхьичIсса муаьллим МахIаммадов Расул ивкIссар. Духлаган дуллай байбивхьуссар буккин-чичин къакIулшиву. Хъунисса хъами, арамтал занан тIивтIуссар ликбез, буккин-чичин, цала цIа-бакI дишин лахьхьиншиврул. Гъумукун муаьллимтал шайсса школалийн дуклан бувхссар мадарасса жагьилтал ва душру.
1936 шинал тIивтIуссар 4 классрал кIулшиву дулайсса школа. Микку дарсру дихьлай бивкIссар муаьллимтал: Мусаев Оьмари, МахIаммадов КьурбанмахIамма, МахIаммадова ПатIимат, Агъаева Шамсият ва м.ц.
Мукьва класс бувккуну махъ оьрчIру, душру 7 класс буккин занай бивкIссар Вихьлив. Вихьлив дарс дихьлай бивкIссар жула шяравасса муаьллимталгу: Амиров МахIаммад, Жамалов ХIамзат, Атаев Мирза, Загьидиев МахIаммад, Аьлиев Рамазан ва м.ц.
1939 шинал Хъювхъиял школалий 7 класс тIивтIуссар. Ва шинал латIин мазрай дарс дишавугу дукьан дурну, лакку алфавитрай дарсру дихьлан бивкIссар. 1939 шинал дуккаврил шин хьхьичIунсса, ларайсса ккаккиярдащал бартдигьаврихлу ва эбратрансса низамрахлу Хъювхъиял НСШ-лун ДАССР-данул кIулшивуртту дулаврил Министерствалул чулухатусса Занази ЯтIул ттугъ буллуссар, школалул муаьллим МахIаммадов КьурбанмахIаммалунгу дуллуссар райондалий хьхьичIра-хьхьичIсса «ХIурматрал лишан» тIутIисса орден. Занази ЯтIул ттугъ школалул итакъабавкьуссар 8 шинай.
Школа тIивтIуния шинмай итабавкьуну бур 78 выпуск. Школалий дайсса диркIссар ххуй-ххуйсса дялахърурду: концертру, байран кьинирдан хас дурсса, зарницарду, походру личIи-личIисса кIанттурдайнсса, смотрду, олимпиадарду, слетру, хIасил райондалий дуллалисса давурттавух ларайсса хIала-гьурттушиву дайсса диркIссар.
Хъювхъиял школа 6-ннал мусил медаллащал къуртал бувссар: Кьаллаев Буниямин МахIаммадлул арс, Сулайманов Тельман Халилуллагьлул арс, Сулайманов Салман Халилуллагьлул арс, Сулайманова Шагьун МахIаммадал душ, Сулайманов Нариман Халилуллагьлул арс, ХIажиева Надежда МахIаммадал душ.
Элмулул доктортал-профессортал хьуссар шама: МахIаммадов МахIач АхIмадил арс, Сулайманова ПатIимат Аьбдуллул душ, Оьмаров Оьмари ХIажимусил арс.
Элмулул кандидатътал хьуссар АхIмадова Хамис АхIмадил душ, Амиров Аьвдурашид Рамазаннул арс, Исяев Шамил Илияслул арс, Сулайманов Нариман Халилуллагьлул арс, ХIусайнова ХIабибат Бадруттиннул душ, Исяева Аза Сулайманнул душ, МахIаммадов МахIамма МахIачлул арс, ЦIунтIаева Заира Нариманнул душ, Кьайсарова Заира Шамиллул душ, Исяева Севиль Азал душ.
1939 шиная дайдирхьуну зий дур В.И. Лениннул цIанийсса Пионер организация. 1939 шиная шихуннай 1985 шинайн дияннин зий диркIссар Комсомол организация, дуссия зий партиялул организациягу. ЦIанасса чIумал школалул дур цуппа заллусса къатри, спортзал, учебная мастерская, предметирттал кабинетру. Яла-яла хьхьичIунмур даву хъанахъиссар шяравусса инсантал циняв буккин-чичин кIулсса бушаву, яни шяраваллил агьалинал дянивсса кIулшиву душиву.
ЧIявур муаьллимтал, бур хIакинтал, инженертал, экономистал. Циняв муаьллимтал хъанай бур жула шяраватусса, шяраву школа къуртал бувсса ва 70%-рал цалгу ларайсса кIулшиву дусса.
2000 шиная шихунмай жул школа хьуну бур «Школа года».
Школа отличнайну къуртал бувми: Исяев Шамил, Загьидиева Раиса, АхIмадова ПатIимат, Сулайманов Тельман, Сулайманов Салман, Сулайманов Нариман, Сулайманова Шагьун, АхIмадов АхIмад, ХIусайнова Ххамис, Сулайманова Ирина, Гъазиева ПатIимат, Мусаева Магьрикаят, Исяева Камилла, Исяева Рая, ХIажиева Надежда.
500-нния ливчусса оьрчIал ларсъссар дянивсса кIулшиву, вайннавату чIявуминнал – пишалул кIулшиву. Мадарассаннал ларсъссар хIукуматрал ларайсса цIарду: Загьидиев Сергей, Дагъусттаннал лайкь хьусса муаьллим (аьпа баннав цал), Кьайсаров Сулайман, Дагъусттаннал лайкь хьусса муаьллим, Жамалова Шамсият, Дагъусттаннал лайкь хьусса муаьллим, Кьурбанов Аьбдуллагь, Дагъусттаннал лайкь хьусса халкьуннал хIакин, Шахшаев АбутIалиб, Дагъусттаннал лайкь хьусса халкьуннал хIакин, Шахшаев Аьлил, Дагъусттаннал лайкь хьусса агроном, АхIмадова СултIанат, Дагъусттаннал лайкь хьусса муаьллим, АхIмадов АхIмад, Дагъусттаннал лайкь хьусса маданиятрал зузала, Сулайманов Халилуллагь, Дагъусттаннал лайкь хьусса муаьллим, Сулайманов Сяид, Дагъусттан Республикалул муниципал къуллугърал лайкь хьусса зузала, Аьлиева Жанна, Дагъусттаннал лайкь хьусса муаьллим, Исяев Хизри, Дагъусттаннал лайкь хьусса ризкьичи, МахIадов ЯхIия, Дагъусттаннал лайкь хьусса ризкьичи, Гъазиев Аьлил, Дагъусттаннал лайкь хьусса механизатор, Исяев Шамил, хIакин, АхIмадов Муса, шяраваллил хозяйствалул лайкь хьусса экономист, МахIаммадов МахIач, шяраваллил хозяйствалул лайкь хьусса экономист.
1924 шинал тIивтIуну бур 1 класс байбихьулул школалий, муаьллимгу ивкIун ур МахIаммадов Расул. 1939 шинал тIивтIуну бур биял бакъасса байбихьулул школа, директорну ивтун ур Мусаев Оьмари.
1959 шинал тIивтIуну бур байбихьулул школа, директорну ивтун ур Сулайманов Халилуллагь. 1965 шинал тIивтIуну бур мяйра шинал школа, 1971-1972 шиннардий – урчIра шинал школа.
1960 шинайн бияннин школа бивкIун бур ккурчIав личIи-личIисса къатраву, 1960 шинал бувну бур цIана бусса кIанай ЧитIул Аьйшал хъув. 1970 шинал бувну бур спортзал.
Гихунмайгу буссар
ХIадур бувссар байбихьулул классирттал учитель Кьурбанова Софият МахIаммадовнал
