[dropcap]А[/dropcap]прель зурул 20-нний 93 шин бартларгунни цIанихсса учитель, РСФСР-данул Халкьуннал кIулшивуртту дулаврил отличник, ДР-лул лайкь хьусса учитель,Буттал КIанттул цIанийсса дяъвилул ветеран МахIаммадов Ярагъи МахIаммадлул арснан.

---

Увну ур Ярагъи ЦIийшиял шяраву. Вихьлив арулва классгу къуртал бувну, дуклан увххун ур Гъумуксса педучилищалувун. Педучилищалуву Ярагъинащал архIал дуклай ивкIун ур ванал цала хъунама уссугу. Му чIумалсса дуккавугу диркIссар багьлухсса. Оьрмулул бугьара хьусса нитти-буттан захIматну бивкIун бур кIия оьрчIал дуккаврих харжлугъ бишин. Мунияту ца курс­гу бувккуну, Ярагъи лавгун ур колхозраву зун. Жагьилсса оьрмулий ва лайкь хьуну ур «За трудовую доблесть» медальданун.

Ярагъинал хъунама уссил, хушрай аьрайн лавгун, дяъвилул цIараву къучагъшиврий жан дуллуну дур. ЧIивима уссу АхIмадпаша дуручлай ивкIун ур Ираннал чIарахсса дазу. Дяъви къуртал хьуну махъ му зана хьуну ур ватандалийн.
Дяъвигу къуртал хьуну, дуниял паракьат хьуну махъ Ярагъигу дуклан лавгун ур Гъумучиял школалийн ва му ххуйсса кьиматир­ттай къуртал бувну бур.

Му чIумал ванан пикри хьуну бур учительнал пиша язи бугьан. 1948 шинал Ярагъи увххун ур Дагъусттаннал ПаччахIлугърал педагогикалул институтрал тарихрал факультетрайн. Институт къуртал бувну махъ жагьилсса учитель гьан увну ур Къарабудахккантуллал райондалийсса школалул директорну. 1955 шинал ивтун ур Ккуллал школалул директорну. Ванал каялувшиву дуллали­сса шиннардий Ккуллал школалий хьуну дур хъин чулиннайсса диял­сса дахханашивуртту.

1963 шинал, хьхьичIунсса директор хIисаврай, Ярагъи ивтссар Лакрал райондалул кIулшивуртту дулаврил отделданул хъунаману. Хъиривмур шинал ва ивтун ур вава къуллугърай Ккуллал райондалий. Хъунмасса захIмат бивхьуссар ванал райондалул школарттай ду­ккаврил ва тарбиялул даву лавай­сса даражалийн дуцин. Ярагъи ва къуллугърайсса чIумал сайки циняв школардай бувну бивкIссар цIу-цIусса корпусру ва классру. Мукунма ванал хIарачатрайну Ва­ччав, Вихьлив, Ккулув, Хъусрахь, ЧIяв тIивтIуссар оьрчIансса яслилул группарду. Ва къуллугърай зузиссаксса хIаллай Ярагъинал лайкь дурссар «РСФСР-данул Халкьуннал кIулшивуртту дулаврил отличник», «ДАССР-данул лайкь хьусса учитель» тIисса бусравсса цIарду.
Итххявхсса каялувчи ва сакиншинначи хIисаврай, 1968 шинал ва увчIуну ур Ккуллал райондалул исполкомрал председательну.

Ва къуллугърай зузисса 15 шинал мутталий ванал хъунмасса захIмат бивхьуссар райцентрданул ва шивун духхайсса шяраваллал ма­съалартту щаллу баврил ялув. 1969 шинал январь зуруй тIиртIуссар МахIачкъалалия Ваччав, Ккулув ва Хъусрахьхьунсса автобусрал маршрут. Му даврий зузисса хIаллайгу Ярагъи лайкь хьуссар «ХIурматрал лишан» ва ЗахIматрал ЯтIул ттугълил орденнан.

1983 шинал, цIуллу-сагъшиврул тагьар сававну, му къуллугъ кьабивтун бур. Амма даврил опыт бусса, гьунар бусса пишакар мудангу тIалавну ивкIссар. Ярагъи цIуницIагу ивтун ур Ваччиял дянивмур даражалул школалул директорну. Муния махъгу ва зий, захIмат буллай ивкIссар личIи-личIисса давурттай.
Махъсса шиннардий Ярагъи ­уссия Ккуллал райондалул Хъуни­с­риннал советрал хъунаману, мукуна Республикалулмур хъунисриннал советрал членнугу. Цува зузисса давурттай Ярагъи МахIаммадовичлул хIурмат-кьимат мудангу лавайсса бивкIссар.

ИчIувагу ва ур цинявннан эбратну – кIия арс ва душнил ххаллил­сса ппу. Ванал душ Элеонора Оьмариева щалагу республикалий машгьур­сса, лавайсса даражалул пишакар бур. Кьурахъул шиннардий ва каялувшиву дуллай бур Республикалул Роспотребнадзорданул управлениялий.
Ярагъи МахIаммадовичлул яла кIюламур кIанурив тIурча, бур гьарца ишираву чIарав бавцIусса, даим аякьалийсса, иминсса кулпат Шавлухъ.

ХIурмат лавайсса Ярагъи МахIаммадович, цIуллушиву дулуннав вихьхьунгу, вил кулпатра­хьхьунгу. Ахир хайрданийн ду­кканнав! Вил оьрму чIявуссаннансса дарсри, дагьанир.
МахIаммад Оьмаров