Москавлив лахъа-хъунну дакIнин увтунни Дагъусттаннал халкьуннал шаэр Расул ХIамзатов. Увсса кьинилуцIун бавхIуну, Яузский бульварданийсса шаэрнал гьайкалдануцI тIутIив дишин бувкIун бия мухлукьат халкьуннал.
Мероприятиялий гьур­тту хьунни Аьрасатнал президентнацIунсса Дагъусттаннал вакилнал бигарду чIумуйсса бартбигьлагьисса Руслан Нагиев, «Дагестан» МЦК-лул президент Арсен ХIусайнов, шаэрнал душ ПатIимат Расуловна ва мачча-гъанми, Москавлив ялапар хъанахъисса дагъусттанлувтал ва Р.ХIамзатовлул творчество ххирами. Шаэр дакIнин утлатисса, ванал творчествалун лавайсса кьимат бишлашисса ихтилатру бунни Руслан Нагиевлул, Арсен ХIусайновлул, паччахIлугърал ишккакку Рамазан АьбдуллатIиповлул ва м.ц.

 
Руслан Нагиевлул кIицI лавгунни Расул ХIамзатов щалагу дунияллий машгьурсса шаэр ушиву, ванал творчество къакIулсса нажагьсса бушиву, шаэрнал произведенияртту чIявусса мазурдийн таржума бувну бушиву. ГьайкалдануцI тIутIив дирхьуну махъ, гьурттучитурал бувккунни ванал шеърирду, увкунни балайрду. Мероприятие къуртал хьунни Р.ХIамзатовлул мукъурттийсса машгьурсса «Кьурукьру» композициялийну.