Июль зурул 21-нний МахIач­къалалив, Къумукьнал театрданул залдануву, хьунни ПатIиматлул ва Аминатлул филармониялул музыкалул концерт. 

Тамашачитураща вичIи дишин бювхъунни дунияллул классикалул шедеврардах: Франц Шубертлул, Сергей Рахманиновлул ва Иоганнес Брамслул произведениярттах. Оьмаровахъал концерт хьунни «Студенты консерваторий России на сцене Дагестанской филармонии» тIисса гьарица шинахсса филармониялул проектрал бутIану. ПатIимат ва Аминат Оьмаровахъул цалчинни Дагъусттаннал тамашачитурал хьхьичIун цала гьунардащал бувксса. Вай лавайсса даражалий кьамул бунни тамашачитурал.
ДакIнийн бутан, Таранто тIисса Италиянал шагьрулий хьусса «Arcangelo Speranza» конкурсрай гьуртту хьунни щалагу дунияллиясса 30 пианист. П.И.Чайковскийл цIанийсса Москавуллал паччахIлугърал консерваториялул фортепианолул факультетрал 3-мур курсрал студентка Аминат Оьмаровал лавайсса даражалий Шубертлул, Рахманиновлул ва Бабаджаняннул макьанну рурцуну, кIилчинмур премия лайкь дунни. Аминат цуппа Дагъус­ттаннай бувсса бакъанугу, вайннал кулпатрал мархри, культура шичча нанисса дур. Дагъусттаннай ва цаламунин ккаллину бур. Ванил хъунмур ссу ПатIимат вава факультетрал 4-мур курсрай дуклай бур.
Вай кIивагу дунияллул халкьуннал дянив­сса ва Аьрасатнал сий дусса конкурсирттал лауреатътал бур. Вайннал ппу РГГУ-лул (Аьрасатнал паччахIлугърал гуманитар университет) профессор МахIаммад Оьмаров Ккуллал шяравасса ур.
ПатIимат ва Аминат Оьмаровхъул бур тарихраву цалчин академический музыкалул ххуллий лавайсса даража ккаккан бувсса Ккуллал шяраваллил вакилтал.

Андриана Аьбдуллаева