Июльданул 26-нний Федор Щукиннул Дагъусттаннал Конституциялул кьинилун хасну хьхьичIунми дагъусттанлувтуран наградартту дуллунни. Миннавух бур хIакинтал, учительтал, аьра­литал, чIяву оьрчIру бусса нину-ппу, культуралул зузалт ва муниципал къуллугъчитал. 

Изображение

БакIрай республикалул каялувчинал бавтIминнахь барча дунни региондалул байран. «Гьанумур документ кьамул баву хъанахъиссар уттизаманнул Дагъусттаннал тарихраву агьамсса ишну. ЦIубутIуй кьамул бувну бивкIссар 1994 шинал Конституция, яла – цIанагу зузисса 2003 шинал Дагъусттан Республикалул Конституция. Ва хIакьинугу хъанахъиссар республикалул лябуккулул цIакьсса праволул гьануну. НахIакьдан бакъархха Конституциялул преамбула байбихьлахьисса укунсса мукъурттия «Жува, Дагъусттан Республикалул чIявумиллатру бусса халкь – Аьрасатнал Федерациялул чIявумиллатру бусса халкьуннал ца агьамсса бутIа хъанахъиссару, тарихраву цасса паччахIлугъравун цачIун хьусса…». Вай мукъурттил чIалачIи буллай бур жула хъуними ххазинарду – цашиву, куннан куннал хIурмат баву, Буттал КIанттул кьадарданухлусса жаваблувшиву, бавкьуну ва кунная кув рязину ялапар хъанахъаву», – увкунни Щукиннул.
Респуликалул бакIчи лаивзунни мукуна СВО-лул гьурттучитурайнгу. Ванал тIимунийну, вайннал дуручлай бур билаятрал мюхчаншиву, суверенитет ва ялун нанисса никру гуж бусса ва щийнчIав хъар бакъасса Аьрасатнаву ялапар хъанансса ихтияр.
Федор Щукиннул личIинува кIицI бунни Каспийскаллал флотилиялул аьралитал.
«ХIакьину жува мукунна кIицI дуллай буру АьФ-лул Аьралий Хьхьирил флотран 330 шин шаву. Аьралий моряктал даиман цIакьну бавцIуну бивкIссар паччахIлугърал национал мурадирттал къаралданий, хIакьинугу лайкьну бартдигьлай буссар цайвасса буржру».