ЦIуссалакрал райондалул щархъавугу лавайсса даражалий кIицI ларгунни Дагъусттаннал Конституциялул кьинилун хас дурсса шадлугъру.
Ва кьинилун хас дурсса концертру ва личIи-личIисса мажлисру хьунни ЦIуссалакрал райондалул цинярдагу щархъаву.
Райондалул Культуралул ва досуграл къатлул зузалтрал ккаккан дунни жалин щар бувцуну махъ шамилчинсса кьини дайсса аьдат. Ва ххаллилсса аьдат хъамакъаритаву мурадрай дансса пикри хьуну бия РЦДК-лул зузала Гулизар Сайпуллаеван.
Жалин щинав бучIайсса ­аьдат лакрал цаппара щархъаву хIакьинусса кьинигу яхьуну дур. Ва дур жалин ласнал къатлухух лаган баву, талихIрай ­оьрму ­бутлай байбишаву мурадрай дуллалисса аьдат.

Жалин щинав бувцуну бачин хьхьичI, кIюрххилва бивзун, маччами-гъансса, чIаххув-чIарахсса душру-хъами варакъащал, гунгунттащал букIлай бур наврузбагнал ужагърайн. Инсантал бучIаннин, исвагьисса бузма-яннагу ларххун, арцу-мусил чIюлушиннардугу дирчуну, ялугьлай бур жалин. Яла бала-гьалайлущал цинявппа жалиндалул лагма лавгун най бур щаращуйн. Ххуллийх вайннавух хIала бухлай бур мюрщи оьрчIру ва душру. Жалиндалул чулуха­сса душру бур ххуллийх хьунабавкьусса оьрчIайх ххунклуй думур дачIлай.

Цалчин щаращуя гунгуми буцIинсса ихтияр дуллай бур жалиндалухьхьун, яла – ванищалсса душваврахьхьун. Щинал бувцIусса къукъурдугу щяв бивхьуну, щаращучIа буллай бур зунняв-дачIулухунсса ссувхIат. Жагьилтурал душру къавтIун бизан буллай, дуллай бур тяхъашивуртту. Укун, марцIсса щинал щаращуя байбихьлай бур жалиндалул талихI-тирххандарайсса цIусса оьрму.
Шичча цинявппа зана хъанай бур авадансса ссупрарду тIивтIуну ялугьлагьисса наврузбагнал ужагърайн. Жалиндалул цила къукъулува цалчин щин дуллай бур ласнал ниттин, яла цинявппа хъамаллуран.
ХIайп, хIакьинусса кьини ваксса ххуйсса аьдат щархъаву яхьуну дакъашиву, так байраннал мажлисирттай дакъа дакIнийн рутлай бакъашиву.

Имара Саидова