Аьрасатнал шяраваллил хозяйствалул министр Оксана Лут июльданул 27-нний хьунабавкьунни Дагъусттаннал ХIукуматрал председатель МахIаммад Рамазановлущал.

Вайннал ххал бивгьунни региондалул АПК-лул лябуккулул, КРСТ тIисса программа бартдигьаврил ва му аралунсса зузалт хIадур баврил масъалартту.
Дагъусттаннал агропромышленностьрал комплексраву хъин чулиннайсса дахханашивуртту хъанай дур паччахIлугърал чулухасса кабакьулийну. 2026 шинал республикалул шяраваллил хозяствалун итадаркьуну дур 3,4 млдрд къурушрал.
2025 шинал шяраваллил хозяйствалул бакIлахъия гьарза хьуну дур 3,1 %. Экспортрал лагру хъунна хьуну дур 34,8 %.
Хьунабакьаврий личIину къулагъас дунни мелиорациялул инфраструктура цIу дуккан даврих. Аьрасатнал Минсельхозрал хIукмулийну хIакьину республикалий анавар дуккан дурну дур мелиорациялул объектру цIу буккан баврил давуртту.

МахIаммад Рамазановлул барчаллагь увкунни Самур-Дарбантуллал канал цIу дуккан дан ва интту тIабиаьт оь дикIаврийну хьусса апатIру лахъан хъузалтран арцуйнусса кумаг баврихлу. Миннал мукунма ххал бивгьунни «Комплексное развитие сельских территорий» тIисса паччахIлугърал программа бартдигьаврил хIакъиравусса масъала. Ряхра шинал мутталий региондалий къатрал дузал бувну бур 1,2 азарва кулпат, миннувух «Шяраваллил ипотекалул» кумаграйну бартдиргьуну дур 168 дузалшиндарал проект, бувну бур ва цIу буккан бувну бур 37 социал ва коммунал инфраструктуралул объект, бувну бур ва бакьин бувну бур 14 километралийсса шагьраххуллурдал.
Региондалийн жагьилсса пишакартал бучIан баву мурадрай, тIитIлай бур агротехнологиялул классру, зузи дурну дур дуккаврил ва практикалул системартту.

ХI. Аьдилов