Сентябрьданул 15-нний Ккуллал райондалул Культуралул къатраву лахъа-хъунсса даражалий кIицI ларгунни Дагъусттаннал Халкьуннал цашиврул кьинилун хас дурсса мероприятие.

Шадлугърал мажлис тIитIлай, ихтилат бунни Ккуллал райондалул бакIчинал хъиривчу Анатолий Давдиевлул.
– ХIакьину жува кIицI лаглай буру Дагъусттаннал Халкьуннал цашиврул кьини. Ва хъанай дур миллатирттал дянивсса дусшиврул, куннал кув бугьаврил барашинна.Байрандалул дур тарихийсса мяъна, ­Аьрасатнал паччахIлугъ, билаятрал гуж ва сий, инсантурал цашиву ва Ватан ххирашиву цIакь шаврил цIаний халкь цачIун буллалисса. Жулва мураднугу хьун аьркинссар ва цашиву никирая никирайн дуруччаву, – увкунни ванал.

Жяматрахь байран барча дуллалисса ихтилат бунни Ккуллал райондалул бакIчи Ажуб ХIусмановлул.
– Жува пахрулий бикIан аьркинссару зунттал щархъава бувксса, дунияллийх машгьур хьусса аьлимтурая, шаэртурая, композитортурая, пагьламантурая, цIанихсса усттартурая ва хьхьичIун ливчусса жула ватанлувтурая. ЖучIава мудангу кьиматрай бивкIссар ва буссар шяраваллил хозяйствалуха зузисса инсантал. ЦIанагу, хьхьичIавагу Дагъусттаннал халкьуннал циняв кулпатирттаву миллатирттал цашиву ва аслахIшиву цIакьну дуручлай бивкIссар. Миллат личIи къабувну, куннащал кув бавкьуну ялапар хъанай, оьрму бутлай бивкIссар. Жула хьхьичI бивхьусса буржну хъанахъиссар жагьилсса ник Ватан ххирану, Дагъусттаннал халкьуннал аслийсса аьдатирттал, культуралул кьадру буну тарбия даву, миллатирттал дянивсса дакьаву ва уссушиврийсса дусшиву дуруччин лахьхьин баву, – увкунни ванал.
Райондалул Магьирлугърал къатлул зузалтрал ккаккан дунни миллатирттал цашиврун ва дусшиврун хас дурсса концерт.

Имара Саидова