МахIачкъалалив Региондалул Нефтегазовый колледжраву лавайсса даражалий хьунни Буттал кIанттул цIанийсса Хъунмасса дяъвилий Ххувшаву ларсун 81 шин шаврин хас дурсса шадлугърал мажлис.
Шикку гьуртту хьунни ярагъуннил гужирдал ветеран, Маньчжуриянавусса, Чехословакиянавусса, Польшанавусса, мукунма Карибский дяъвилул иширттал гьурттучи, подполковник Нуруттин Амирханов, «Своих не бросаем» тIисса волонтертурал суккушиннарал каялувчи, МахIачкъалаллал Ветерантурал советрал вакил Зарема Абсаламова, Дагъусттаннал Миллатрал политикалул ва диннал иширттал министерствалул вакил Зайдат ХIажикаримова, Нитти-буттал комитетрал председатель Тофик Рамазанов, Т.Мурадовлул цIанийсса Дагъусттаннал филармониялул солистка Тахмина Мирай, Гьинда ХIажиевал каялувшиннаралусса Кадетътурал корпусрал дуклаки оьрчIру, РахIима Сулаймановал каялувшиннаралусса «Салам» тIисса къавтIаврил ансамбль.
Мажлис тIивтIунни колледжрал директорнал хъиривмур Жамиля Каримовал. ХIаятраву лархъсса Совет Союзрал Вирттаврал стендрачIа колледжрал хьхьичIунсса студентътурал гьаз бунни цала-цала гимнрахун Аьрасатнал ва Дагъусттаннал ттугъру.
Колледжрал преподавательтал, зузалт, студентътал ва бусравсса хъамал байрандалущал барча буллалисса ихтилатру бунни директор Аьлишер КьурбанмахIаммадовлул ва МахIачкъалаллал Депутатътурал мажлисрачIасса жагьилтурал парламентрал депутат Наиб КьурбанмахIаммадовлул. Хъирив цинявппа бувххунни байрандалун хасну чIюлу бувсса залданувун. Мажлис бачин бувну бия Жамиля Каримова. Шикку ихтилатру бунни хъамаллурал. Буттал кIанттул цIанийсса Хъунмасса дяъвилул иширттая, совет халкьуннал чувшиврия буслай ва Ватандалухасса шеърирду ккалай бия студентътал.
Нуруттин Амирхановлул бувсунни Хъун дяъвилул тарихравусса яла дакIний личIанми иширттая, дазул кьатIув, кIирисса точкардай, захIматсса шартIирдайсса цала къуллугърая .Ванал оьвчаву дунни жагьилтурайн жула тарих хъамакъабитан, дяъвилий жанну дуллусса вирттал дакIний битан.
КIилчинсса дунияллул дяъви хьуну бур инсаниятрал тарихраву яла оь экьи бувтIумурну. Дяъвилул иширттаву гьуртту хьуну дур 61 хIукумат, щалагу дунияллул инсантурал 80%. Дяъвилул ишру най бивкIун бур 40 хIукуматрал аьрщарай, хьхьирирдал ва океаннал майданнай. Ххирану дарцIуну дур дунияллул халкьуннан Ххувшаву. Аьмну 50 миллион халкьуннал ливтIуну бур дяъвилий, миннава 27 миллион совет халкьуннал.
Буттал кIанттул цIанийсса Хъунмасса дяъвилий ва цIанасса чIумал нанисса хасъсса аьралий операциялий жанну дуллуминнал аьпалун баян бунни минутрайсса пахъ багьаву.
Тахмина Мирайл щаллу бунни Аьрасатнахасса, хасъсса аьралий операциялул вирттавран хас бувсса балайрду. «Салам» ансамбльданул ккаккан дунни къавтIавуртту.
Мероприятиялул сакиншинначи Жамиля Каримовал колледжрал администрациялул чулуха хъамаллурахь барчаллагьгу увкуну, буллунни Барчаллагьрал чагъарду ва 9-мур майрал логотипращалсса бахшишру.
Ахирданий цинявппа бавцIуну рирщунни дакIнийбитулунсса сурат.
Андриана Аьбдуллаева
