Ххувшаврил байрандалул гьантрай МахIачкъалалив марчарчарил ула лархъунни Буттал кIанттул цIанийсса Хъун дяъвилул гьурттучи, ЧIяйннал шяравасса Ибрагьимлул арс Илияс Ибрагьимов ялапар хъанай ивкIсса къатрал чIирайн.

Ветеран дакIнин утлатисса аьпалул мажлисрай гьуртту хьунни Дагъусттаннал региондалийсса Аьрасатнал Ветерантурал советрал председатель МахIарам Аьлиджанов, Дагъусттаннал бакIчинал Хъунилсриннал советрал каялувчинал хъиривчу Шалласу Шалласуев, МахIачкъала шагьрулул Ветерантурал советрал председатель Ферезуллагь Кахриманов, хасъсса аьралий операциялул гьурттучи Марат Бабаев, МахIаммад Оьмаров, Арсен Аьбдуллаев ва ЧIяйннал шяраваллил жямат.
Мармарчарил улттуя пардав дуркьуну махъ, аьпалул мажлис тIитIлатIисса ихтилат бунни МахIарам Аьлиджановлул.
– ХIакьину шикку дуллалисса даву хъуннасса агьамшиву дусса, тарихраву дакIний личIансса иширан ккаллиссар. Республикалул Ветерантурал советрал хъунмасса хIарачат бунни Илияс Ибрагьимовлул цIа абад даврин хас дурсса даву дузрайн дуккан дуван. Гихунмайгу жу МахIачкъала шагьрулул ца кIичIираваллин ванал цIа дизансса пикрилий буру.

Хъун дяъвилул ветеран Илияс Ибрагьимов увну ур 1922 шинал ЧIяйннал шяраву. Арулва классгу бувккуну, Илияс хъунама уссийщал хIухчушиву дуллай, чIавасса оьрмулий колхозраву зий ивкIун ур.
Хъун дяъви байбивхьусса ппурттуву увцуну ур ЯтIул Аьра­луннаву къуллугъ буллан. Ххишала акъа сивсусса, кьянкьасса жагьилнайн тапшур бувну бур 120 мм (миллиметровый) полковой минометрал батальондалул командиршиву дан. Дяъвилул чIумал ва яла цIакьмур ярагъ ишла буллалисса, ца яла гуж бумур полкран ккаллину бивкIун бур. Илияслул цалчинсса аьралий награда, «За отвагу» медаль, лайкь дурну дур хъуннасса агьамшиву дусса душманнал стратегиялул объект пIякь учин баврихлу. Харьков шагьрулучIан гъансса талатавриву ванайн кIусса щаву дирну, тамансса хIаллай госпитальлай хъин хъанай ивкIун ур. Хъин хьуну, ччаннай авцIуну махъ, цIунилгу зана хьуну ур цанма ххирасса полкравун.
Нигь-ццах цирив къакIулсса, чувшиврул бутIа ххишалану буллусса къучагънал дяъвилул цIараву цимилагу ккаккан бувну бур цала гьунар ва бюхъу. Ца ппурттуву хьусса оьсса талатавриву цала батальондалущал Илияслул пьякь учин дурну дур немецнал машинарттал кьюкьа ва аьралий техника. Ва гьунарданухлу Илияс лайкь хьуну ур ЯтIул ЦIукул ордендалун. Цувагу, дяъви къуртал хьунцIа, минометчикну хьхьичI ххуттай талай ивкIун ур. Дяъвилул цIараву ккаккан дурсса къучагъшивурттахлу лайкь хьуну ур Буттал КIанттул цIанийсса Хъун дяъвилул 2-мур даражалул ордендалун, «За оборону Советского Заполярья» медальданун ва цаймигу ларайсса наградарттан.
– Вирттаврал дурсса къучагъшивуртту ялун нанисса никиран цIакьсса дарсну хьун аьркинссар, ми хъамаритан къабучIиссар. Барчаллагь учин ччай ура буттал цIа щяв дагьан къариртун, къириятрай ядуллалисса Илияслул наслулийн, арснайн Рамазаннуйн, душваврайн Залиххайн, ПатIиматлуйн ва цинявппагу вайннал чIарав бавцIуминнайн, – увкунни Аьли­джановлул.

Хъирив ихтилат бунни Ферезуллагь Кахримановлул.
– ХIакьину жува барашинна дуллай буру виричунал цIа абад дуллалисса, тарихраву личIансса агьамсса иширал. Ххувшаврихлу жанну дуллуминнал аьпа абад буллалисса давурттан багьа бакъассар. Хъун дяъвилий талай бивкIсса буттахъул кунма, цIанасса ппурттуву хасъсса аьра­лий операциялул иширттаву вайннал наслугу къучагъну талай, Ватан дуручлай бур. Илияс Ибрагьимов жула дакIурдиву личIантIиссар хIакьсса Виричуну, – увкунни Кахримановлул.
– Ватан дуручлай, жанну кьурван дурминнал аьпа абад баврин хас дурсса давуртттал, лакрал миллатраву бакъассагу, республикалул тарихравугу агьамсса кIану бугьлагьиссар. Шикку хьусса ихтилатирттаву кIицI лавгунни Илияслул чIавасса оьрмулий дурсса хьхьичIуннайшивуртту. КIицI къабувну битан къахьунссар, Ккуллал райондалий ВЛКСМ-рал чулухасса награда хьхьичIра-хьхьичI Илияс Ибрагьимовлул ларсун диркIшиву. 1941 шинал чIавасса Илияслул ххяллуйх яларай, куртIсса кьакьалувун ахьния дагьан нанисса яттил гьухъала ххассал дурну диркIун дур. Ванал дурсса даврин лайкьсса кьимат бишлай, дуллуну дур ванан ва награда.
1942 шинал лавгун ур фронтрайн, дяъвилул къизгъинсса талатавурттал цIаравун. Ванал каялувшиннарайсса минометный роталул кьатI дурссар цикссагу фашистътурал кьюкьри. Талатавриву ккаккан дурсса чувшиврухлу кIийла лайкь хьуну ур ЯтIул ЦIукул орденнан ва ЯтIул Ттугълил ордендалун. 1945 шинал машгьурсса журналист Александр Путербротлул Илияс Ибрагьимовлул фамилиягу кIицI ларгун диркIссар Вирттаврал цIарду дулунтIисса ххюя аьралийчунал сияхIравух. Амма, циваннив му мурад щаллу къавхьуну бур. ЧIяйннал шяраву Илияс мудангу хIурмат-кьиматрай хьунаакьайссия. Дяъви къуртал хьуну махъгу Илияс шяраву, райондалий дуллалисса цинярдагу мероприятиярттай чялишну гьуртту шайссия. ХIакьсса зат бур, къучагътурая гъалгъа тIутIиссакссар, вай уттавассар тIисса зат. Хъама мабитари Ватан дуручлай бивкIми! – увкунни Шалласу Шалласуевлул.
Арсен Аьбдуллаевлул дурккунни Илияс Ибргьимовлун хас дурну чирчусса назму.
Виричунал гьунарданун лавайсса кьимат бишлашисса ихтилат бунни Марат Бабаевлул ва МахIаммад Оьмаровлул.
Ахирданий Илияс Ибрагьимовлул арс Рамазаннул барчаллагь увкунни цала чIарав бацIан бувкIминнахь.

Имара Саидова