Дагъусттаннал чIумуйнусса бакIчи Фёдор Щукиннул республикалул парламентран маслихIат бунни ХIукуматрал хъунаману итан МахIаммад Рамазанов.
«МахIаммад Исрапилович аьралий ва паччахIлугърал къуллугъирттай зузисса ппурттуву биялсса опыт салкьи хьусса каялувчири, Аьрасатнал президентнал полпреднал хъиривчуну зузинийгу даврил опыт куртIгу, цIакьгу бувсса.
Хаснува яргну ванал цала бюхъу-бажар ккаккан бунни республикалий щинал хъунисса зараллу бивсса ппурттуву.
Президент Владимир Путиннул ХIукуматрал комиссиялул председательнал хъиривчуну тIайла увккуна ва Дагъусттаннайн, ванаща бювхъунни баллалувун багьминнан кумаг буллалисса даву сантирайн дутан. Тания махъгу ва хъуннасса къулагъас дуллай ур агьалинал обращениярттах, республикалул агьалинащал маз ляхълай, куртIну хьхьичI бавцIусса масъалартту ххал бигьлай, цукунсса чаранну ва ххуллурду хьхьичIххуттайн ласун бурив хъирив лавну зунсса хIарачатрай ур», – увкунни Фёдор Щукиннул.
МахIаммад Рамазановлул Халкьуннал Мажлисрал сессиялий цайнна вихшала дурсса Фёдор Щукиннухь барчаллагь тIий, кIицI лавгунни, цайрасса хъуннасса жаваблушинна ва тIалавшинна кIулну зунтIишиву.
«На ттущава шаймур бувантIиссар ХIукуматрал зузалт, агьалинал цIуцIикIантту ва буруккинтту хьхьичIун лавсун, бавкьуну, марцIну, лябуккулий ва сантирай зузаврил ялув. Ттула опытрайнгу чул бивщуну, зунтIиссара республикалул агьалинал оьрму хьхьичIунмай хъит учин бувансса ниятрай», – увкунни МахIаммад Рамазановлул.
Республикалул парламентрал депутатътурал циняв бавкьуну, МахIаммад Рамазанов цIакь унни Дагъусттаннал ХIукуматрал председательну.
ПатIимат Рамазанова
