ЧIярусса шиннардий Ккуллал РОВД-лул хъунаману зий ивкIсса Хъусращиял шяравасса Нураттиннул арс Кьурбан Ванатиевлун майрал 5-нний хьунтIиссия 100 шин. Къуллугърал бурж яхI-намусрай, адав-инсап дуну, дакI марцIну биттур буллай ивкIсса Кьурбаннул цIа райондалул жяматрал хIакьинусса кьинигу хIурмат-кьиматрай дакIнин дутай.
Инсан дакIний личIай оьрмулуву цала дурсса хъин-хъинсса давурттайну. Кьурбан Нураттинович цаятурагу, архIал зузиминнаягу хъуннасса тIалавшинна дусса, къуллугърал бурж хьхьичIун лавсъсса, давриву итххявхсса, гьарица ишираву марцIсса, уздансса хасиятру дусса инсан ивкIун ур.
Кьурбан увну ур 1926 шинал Хъусращиял шяраву ххишала бакъа бусраврайсса Нураттиннул ва ПатIиматлул кулпатраву. Шяраву арулва классгу къуртал бувну, гихунай дуклай ивкIун ур ЧIяйннал дянивмур даражалул кIулшиву дулаврил школалий. 1943 шинал Вихьуллал школалий военрукну зий ивкIун ур. 1944 -1948 шиннардий Ккуллал райондалул милицанал отделданул секретарьну зий ивкIун ур. Шикку ванал най бунува ккаккан бувну бур цала бюхъу ва гьунар. Тания шихунай цинявннан эбратну ва дакI марцIну захIмат буллай, органнаву зий дурну дур сайки 40-хъул шинну. Райотделданул милицанал секретарьнал къуллугърая айивхьуну, лавхъуну ур ва райотделданул начальникнал къуллугърайн.
Кьурбаннул хьхьичIунсса хIасиллай бувккуну бур Бакуйсса СССР-данул паччахIлугърал Мюхчаншиву дуруччаврил министерствалул лаваймур школа ва Ростовуллал юридий институт. Зий ивкIун ур оперуполномоченныйну Буйнакск шагьрулийсса МГБ-лий, хъунама оперуполномоченныйну Избербаш шагьрулул РОВД-лий.
Даврил опыт бусса, итххявхсса пишакар 1958 шинал тIалав увну ур ЦIуссалакрал райотделданий каялувшиву дуллан.
Шикку, цаппара шинну зийгу дурну, зана хьуну ур цува зий ивкIсса Ккуллал райотделданийн. 1973 шинайн ияннин каялувшиву дуллай ивкIун ур Ккуллал райондалул милицанал отделданий. Къуллугърай зузиссаксса хIаллайгу цуппа ца иш хьуну бакъар ванал цайнна аьй дучIан дувансса.
Цуксса захIматсса тахсиркаршиву, тIул дакъашиву дурну духьурчангу, Кьурбан Нураттинович хIала увххун махъ му чара бакъа бакIуйн дуккан дайссия. Тай шиннардий хьусса тахсиркаршивуртту ванал аьч дурну, тIайласса танмихIру бувну, инсантал рахIат буккан бувайссия. Ва ия игьалаган къакIулсса, уххаву дакъа зун икIайсса, цил багьайкунсса органнаву зун лайкьсса пишакарнал хасиятру дусса инсан. Кьурбан Нураттиновичлул яла ххуймур хасиятгу дия пахру-ххара бакъашиву, жяматравух мудан хIалану ушиву, аьркинний маслихIат ккавккун, танмихIрайн къабувцунма инсантурал масъалартту лащу-щаллу бан кIулшиву.
Ванал каялувшиннаралу зий бивкIсса зузалтран, оьрмулул ххуллийн тIайла дацIан дурсса жагьилсса никиран тачIавгу хъамакъаитай цахава аякьалий ивкIсса Кьурбан Нураттинович.
ДакI марцIну бувсса къуллугърахлу, давриву хьхьичIунсса ккаккияртту чIалачIи даврихлу ва жяматийсса давурттавух чялишсса гьурттушиннарахлу ва лайкь хьуну ур цикссагу ларайсса наградарттан. Миннувух дур «Отличник милиции» хIурматрал лишан, «За безупречную службу в органах МВД» 1-мур, 2-мур ва 3-мур даражалул медальлу ва ХIукуматрал чулухасса ларайсса наградартту. Къуллугърая лавгун ур Кьурбан майорнал чиндалуву.
Пенсиялийн увккун махъ, райондалий бусравсса ва къуллугърал бурж дакIнийхтуну биттур бувсса пишакар хIисаврай, Кьурбаннун Райпорал сакиншиндарал отделданий каялувшиву дан вихшала дурну дур. Органнаву зий аьдат хьусса Кьурбан Нураттиновичлул райпорал давугу низамрайн дуртуну дур. Ва ичIувагу, даврийгу низам дуручлачисса, тIайламунил ххуллу бувгьусса инсан ивкIун ур.
ЗахIматсса къуллугърай зузисса ласнал чул бищай ттарцIгу, ичIаллил хъар лархъусса, дакI тIайласса оьрмулул дусгу хьуну бур ванан кулпат Шагьун. Гьашину Шагьуннунгу хьунтIиссия 100 шин. Ххуйсса кIулшивурттугу ласун бувну, эбратрансса тарбиягу дуллуну, чивун буккан бувну бур вайннал шама арс ва кIива душ. Буттал ххуллу язи бувгьуну бур хъунама арс Рамазаннул ва ванал арснал Нураттиннул.
Кьурбан Нураттиновичлул кьабивтсса наслу бур цахава лавхьхьусса, кьянкьасса тIалавшиннардай тарбия бувсса, дуккавриву, давриву хьхьичIун ливчусса, буттал цIа лайкьну дуручлачисса.
Бутта кунма, шяраваллил жяматрачIа ва цивппа бусса кIанттурдай бусравну бур вай.
КIицI къабувну битан къахьунссар Ростов-на-Дону шагьрулий ялапар хъанахъисса Нариман Ванатиев Кьурбаннул арс ушиву.
Хасъсса аьралий операция байбивхьуния шинай Нариман уссар ятIатIар бакъа бакъахьусса аьралийтал лякъин ва ми цала -цала Ватандалийн тIайла буккан нитти-буттан ва мачча-гъанминнан кумаг буллай. Инсантурал бакIрачIан кьини дурксса чIумал, Нариман цикссагу агьалинал чIарав авцIунни ва ацIлайна ур.
ХIакьинусса кьини Нариманнуйн барчаллагьрай бур Ккуллал райондалия бакъассагу, щалагу Дагъусттаннаясса аьралийтурал мачча-гъанми.
Ва бусравсса даву даврихлу Нариман лайкь хьуну ур СВО-лул Ветерантурал союзрал чулухасса медальданун, «Сила матерей» МОО-лул, ДНР, ЛНР каялувчитурал чулухасса Барчаллагьрал чагъардан. ХIасил, уздансса хасиятру вайннал кулпатраву ирсирай нанисса дур.
Имара Саидова
