«Дагестан» РИА-лий хьунни агьалинан паччахIлугърал хIаллихшиннарду сакин даврил хIакъиравусса пресс-конференция. Шикку гьуртту хьунни УГИБДД-лул хъунама инспектор, полициялул капитан Асхабаьли МахIам­мадов, МВД-лул Информациялул центрданул паччахIлугърал хIаллихшиннарду дуллалисса отделданул хъунмур, виваллил къуллугърал майор Гульнара Вердиева, Миграциялул управлениялул дазул кьатIаллил паспортру щаллу байсса отделданул хъунмур, полициялул подполковник Зульфия Бабаева, Миграциялул управлениялул отделданул инспектор, полициялул хъунама лейтенант Виталий Пучков.

Андриана Аьбдуллаева
Аьрасатнал Президент В. Путиннул май зурул хIукмурдацIун бавхIуну, гьашину шамилчинсса шинни Виваллил иширттал министерстволул подразделениярттал агьалинан электрон журалийсса хIаллихшиннарду дуллай. Ва даврил мурадгу бур агьалинан бигьа-рахIатшиву даву, вай масъалартту, инсантал хъунмасса хIаллай очердай бацIлацIи къабувну, чIирисса чIумул дянив щаллу баву, мукунма коррупциялул иширттан ххуллу кьукьаву.

Хъамаллурал бувсунни цала-цала къуллугърал бигардая.
Гульнара Вердиевал бувсунни МВД-лул Информациялул центрданул агьалинан танмихIрайн кIункIу аврил (къааврил), архиврал, политикалул репрессиярттахьхьун биривминнал реабилитациялул хIакъиравусса справкарду дулайшиву, апостиль (печать) бищайшиву. Мукунма ванил бувсунни вай хIаллихшиннарду элект­рон журалий щаллу даврил къулайшивурттая. Электрон журалий ларсъсса справкартту, чагъарданийми кунна, тIайласса справкартту хъана­хъиссар. Информациялул центрданул дуллалисса паччахIлугърал хIа­ллихшиннардаву так апостиль бищаву дур багьлухсса ва электрон журалий къадайсса.

Цала къуллугърал буржру биттур буллай, Центрданул зузалт лагай­ссар мушакъатсса ва бюхъу-хъит чансса инсантурачIан шаппа-шаппай. Шинал лажиндарай паччахIлугърал хIаллихшиннардал хIакъираву Информациялул центр­данийн бувкIун бур 13 азаруннийн бивсса аьрза, миннува 7,5 азарва – цасса ПорталданийхчIин. Информациялул центрданул дуллусса справкартту хIакьссар кIива зурул мутталий.
Асхабаьли МахIаммадовлул бувсунни МРЭП-рал (Межрайонное регистрационно-экзаменационное подразделение) дуллалисса хIа­ллих­ши­ннардая, квалификациялул экзаменну кьамул даврия, машинартту сияхIрайн ласаврия. Бувсунни, цачIавагу очердай къабавцIунма, кутIасса чIумул мутталий вай масъалартту щаллу бансса куц.

Миграциялул управлениялул зузалтрал бувчIинбавуртту дунни чил билаятрал инсантал ва гражданство дакъами миграциялул сияхIрай бацIаврил, Аьрасатнал паспортру ласаврил ва баххана баврил, дазул кьатIаллил паспортру лаcаврил, мукунма Аьрасатнал халкьуннал регистрациялул хIакъираву.
Цинявппагу ихтилатчи­тал кIицI лаглай бия вай хIа­ллих­шиннарду бигьану щаллу дан хьунтIишиву электрон журалий gosuslugi.ru порталданийхчIин.