«Жагьилсса пишакартал» тIисса Союзрал баян буллай бур «Будущее – за мастерами» тIисса журналистурал дянивсса конкурс. Ва конкурсрай хьхьичIунсса кIанттурду бувгьусса шама автор тIайла уккантIиссар август зурул 7-13-нний Кьилвалул Сахалиннай хьунтIисса захIматрал пишарду машгьур буллалисса чемпионатрайн.
Имара Саидова
Цалчинсса кIанттурду бувгьусса журналистал барча бантIиссар ва миннан дакIний личIансса бахшишру дантIиссар «ЗахIматрал пишардал» чемпионатрал даврин кьимат бишлашисса шадлугърай.
ЗахIматрал пишардал чемпионатрай гьуртту хьунтIиссар 400-нния ливчусса 14-22 шиннавун бияннинсса оьрчIру ва душру.
Worldskills Russia конкурсрайн тIайла дурксса материаллу дикIан аьркинссар захIматрал пишардал чемпионатрал дурсса даврия ва шикку гьуртту хьусса жагьилсса пишакартурал хьхьичIуннайшивурттая агьалинахь бусласисса. Конкурсрал агьаммур мурад хъанахъиссар захIматрал пишарду машгьур баву ва ми хьхьичIунсса предприятиярттай тIалавну бушиву агьалинан бувчIин баву.
Журналистурал даврин кьимат бишлашисса жюрилуву бур «Жагьилсса пишакартурал (Ворлдскиллс Россия)» Союзрал директор Роберт Уразов, Союзрал коммуникациярттал директорнал хъиривчу Ирина Хворостян, «Аргументы и факты» еженедельникрал Центрданул каялувчи Екатерина Бычкова, «Российская газета» кказитрал редакторнал хъиривчу Алексей Савин, «Россия – 24» каналданул нани дуву ва журналист Станислав Натанзон, «Иннополис Медиа» АНО-лул хъунама директор Александр Писарев.
Конкурсрай гьуртту хьун бюхъайссар федерал ва региондал СМИ-рдал, информациярттал агентствардал журналистътураща ва блогертураща.
Гьуртту хъанахъиминнал аьркинссар тIайла буккан онлайн-аьрза. Кьамул дантIиссар захIматрал пишардая бусласисса макьалартту, радио ва телесюжетру, иллюстрациярду ва фотоматериаллу.
Материаллу дикIан аьркинссар 2018 шинал январь зурул 1-нния июль зурул 10-ннийн бияннинсса кказит-журналлай рирщусса ва телевидениярттай итадаркьусса.
Балжину конкурсрая кIул бан бюхъантIиссар https://worldSkills/ru сайтрай.
