НухIлул душ ХIусманова Шуаьнат

[dropcap]З[/dropcap]ахIматсса цIуцIаврил къашавайгу бивкIун, оьрмулул 82 шинаву жуятува батIул хьунни ххаллилсса зунттал хъамитайпа, ас-намусрал зумабувцIусса инсан, Дагъусттаннай сийлий­сса хIакин, Гъумучиял Жалалхъал НухIлул ва Гьидаятлул душ ХIусманова Шуаьнат.

Шуаьнат бувну бур 1935-кусса шинал Гъумук. КIикку школа къуртал бувну махъ був­ххун бур Дагъусттаннал мединститутравун. Институт бувккуну махъ ряхра шинай зий бивкIун бур Ахъушиял райондалул азарханалий, цал — педиаторну, яла — шанна шинай хъунмур хIакинну. Дарги мазгу лавхьхьуну, ххишала бакъа хIурматрай ва бусраврай бивкIун бур лакку душ жула уссурвалсса миллатрал дянивгу.
1965 шиная шинмай Шуаьнат жард къаувкуну зий бивкIссар Республикалул оьрчIал азарханалий: 2-мур отделениялул каялувчину, хъунама хIакиннал хъиривчуну, хъунмур хIакинну, Республикалул Пульмонологиялул Центрданул хъунмамурну.
Гьарцагу кIанттай ванил хIалал бувну бур архIал зузиминнал ва къашайшалтрал чулуха­сса бухкъалагайсса хIурмат, кьад­ру, кьимат.

Ванин дуллуну дур «ХIурматрал Лишандалул» орден, «Дагъусттан Республикалул лайкь хьусса хIакин» тIисса цIа, чIярусса грамотартту, медаллу, барчаллагьрал чагъарду.
Шуаьнатлул бивкIулул хъуннасса пашманшивугу кIидачIлай, дакIнийхтунусса жижара буллай буру ссурваврахь — Саидахь, Светланахь, АтIахь, куявтурахь, ссурваврал оьрчIахь ва махъсса цинявппагу гъан-маччаминнахь.
Цил бунагьирттал аьпа баннав, рухI рахIатний дишиннав.

Гъумучиял
ва Буршиял жямат

---

ХIажинал душ Агъаева ПатIима

Уттигъанну, июнь зурул 12-нний, оьрмулул 74 шинаву аьпа­лухьхьун лавгунни уздансса лакку хъамитайпа, ДР-лул чавахъирттал хозяйствалул лайкь хьусса зузала, Къяннал шяраватусса ХIажинал душ Агъаева ПатIима.

Бувну бур Къяннал шяраву 1943 шинал. Райондалий 10 класс­гу къуртал бувну, ПатIимал бувккуну бур Дагъусттаннал шяраваллил хозяйствалул институт­рал дахьва тIивтIусса экономикалул факультет.

ЗахIматрал ххуллу байбивхьуну бур, Щардал колхозрал экономист-бухгалтерну зий. Яла зий бивкIун бур Ккурккуллал колхозрал хъунмур бухгалтерну, Хьурттал совхозрал хъунмур экономистну. МахIачкъалалив бивзун махъ 18 шинай зий бу­ссия «Запкасприбводрал» хъунмур бухгалтерну. ДакIнийхтуну бивхьусса захIматрахлу лайкь хьуссар «Заслуженный работник рыбного хозяйства РД» цIанингу.

Чув зий бухьурчагу, цила даврил бурж лажин кIялану би­ттур бувссар ванил. ПатIима бия дакI-аьмал хъинсса, инсаннан хъинбала бан чялишсса, уссур-ссу, гъан-маччами ххирасса инсан.
ПатIима ахиратрал шаврил хъуннасса кьурчIишиву кIи­дачIлай, жижара буллай буру душваврахь, миннал оьрчIахь, гъан-маччанахь ва махъсса цинявннахьвагу.
Гьав нурданул дуцIиннав, алжаннул ххари баннав. Махънал оьрмурдай барачат бишиннав!

Къяннал жямат