Аьрасатнал паспортру тапшур бунни

Аьрасатнал паспортру тапшур бунни

Июнь зурул 27-нний МВД-лул Миграциялул управлениялий шадлугърал даражалий Аьрасатнал паспортру буллунни дазул кьатIувсса гъансса билаятирттаясса 15 инсаннан. Аьрасатнал граждантал хъанахъиминнахьхьун паспортру булун бувкIун бия Аьрасатнал Виричу Загьид Загьидов, Миграциялул къуллугърал ветерантурал организациялул хъунама Играм МахIаммадов, мунал хъиривчу МахIаммад Халияев.


Андриана Аьбдуллаева
Паспортру ласласими барча буллалисса ихтилат бунни Миграциялул управлениялул хъунама МахIаммад МахIаммадовлул. Ванал бувсунни Миграциялул федерал къуллугъ букьан бувну, вай бигарду Виваллил иширттал министерствалийн тапшур бувния шихунай цува ва управлениялул хъунаману ушиву, цала зузалтран миграциялул масъалартту щаллу буллай ххишала дакъа хъуннасса даву дуллан багьлай бушиву.

ХIакьинусса кьини Дагъусттаннал МВД-лул Миграциялул управлениялул 30-нния лирчусса паччахIлугърал хIаллихшиннарду дуллай бур агьалинан. Ларгсса шинал 1500 инсаннан буллуну бур Аьрасатнал паспорт. Гьашину ххюва зурул дянив – 450 инсаннан.

Аьрасатнал гимн щаллу дурну махъ Загьид Загьидовлул паспортру буллунни 15 инсаннахьхьун. Миннавух бия Донецкаллал областьрая бувкIссагу. Паспортру лавсун махъ Донецкалия бувкIсса Наталья Байрамовал цала кулпатран ва ххарисса кьини пишкаш дур­сса Миграциялул управлениялул хъунама МахIаммад МахIаммадовлухь ва щала коллективрахь дакIнихтунусса барчаллагь увкунни.

 

Читайте также: