Агьалинай къия къахьун

Агьалинай къия къахьун

Июнь зурул 27-нний Дагъусттаннал региондалийсса «Справедливая Россия» партиялул отделениялул офисрай хьунни махъсса ппурттуву агьалинал дяниву авазалувун багьсса пенсиярттал реформалул хIакъиравусса пресс-конференция.


Имара Саидова
Ва масъалалул хIакъиравусса ихтилатру бунни Дагъусттаннайсса «Справедливая Россия» партиялул отделениялул каялувчи, ДР-лул Халкьуннал Мажлисрал председательнал хъиривчу Камил Давдиевлул, Региондалийсса партиялул Советрал Бюрорал секретарь, ДР-лул Халкьуннал Мажлисрал депутат Мурат Пайзуллаевлул.

Мукунма шикку гьуртту хьу­нни «Справедливая Россия» партиялул чулухасса депутатътал, региондалийсса партиялул отделениялул Советрал члентал ва журналистал.
Камил Давдиевлул балжину бувсунни «Справедливая Ро­ссия» партиялул хъунмур советрал президиумрал АьФ-лул ПаччахIлугърайн пенсиялийн буклакисса шинну гьарза къадаву ва пенсиярттал фонд авадан даву мурадрай дуллан­сса давуртту кIицI лаглагисса тIалавшиннардая.

«Справедливая Россия» партиялул тIалавшиннарду дур пенсиярттал реформа агьалинан зарал къахьунну даву мурад­райсса. Вайннал сукку дурсса тIалавшиннардайн бувну, цалчин захIматрал пенсиялул лаг­ру хъар хъанай дур стажрайн ва харжирайн. КIилчин, стажравун духхан аьркинну дур аьралуннаву къуллугъ буллалисса, дуклай ивкIсса ва декретрал отпускалийсса ва цаймигу чIунну. Шамилчин, 2030 шинайн бияннин пенсиярттайн буккайсса шинну гьарза дан къаритансса къадагъа дишин аьркинссар.

Камил Давдиевлул кIицI лав­гунни «Справедливая Россия» партиялул пенсиярттал хIа­къиравусса реформалийн къарши бацIаву тIалав дуллалисса оьвчаву дуршиву цинярда партиярдал фракциярдайнгу.
Давдиевлул мукунма бувсунни, пенсиярттал реформа къадурнура, пенсиярттал фонд авадан даву мурадрай партиялул лявкъусса ххуллу-чаранная.
— Гьашинусса бюджетрал пландалий ккаккан дурсса доходирттаяр 1,8 триллион арцул ххишала хьуну бур, шинал ахирданийнин хьун най бур 2,8 триллион.

КIилчин, ххуйну хьунссия цаймигу ххуллурду ишла барчан, Масалдаран, госзакупкардал дянивсса конкуренция гьаз даврийну (ца шинай 3-4 триллион арцул махъ бишин хьун­ссия). 24 миллион арцул шинай доходру думинная 18% доходрал бугьларчан, шинай 200 миллиард арцул цачIун буван хьунссия. Укунсса чаранну иширайну дузрайн буккан булларчан, авадан хьунссия пенсиярттал фондгу, — тIий ур Камил Давдиев.
Хъирив Камил Давдиевлул дуллунни бавтIминнал суалла­хьхьунсса жавабру.

Читайте также: