Журналистурал аьрххирду личIи-личIисса кIанттурдайн багьай. Ттунгу уттигъанну архIал бизан багьунни Кьасумккантлив конференциялийн нанисса инсантуращал. Информациялул ва печатьрал министр Рашид Акавовлул ва Дагъусттаннал Журналистурал союзрал председатель Аьли Камаловлул сипталийну, гай гьантрай тикку хъанай дия кказит буккултращалсса хьунабакьаву. БувкIун бия му давривух гьуртту хьун Дагъусттаннал печатьрал ва телевидениялул жаваблувсса цайми зузалтгу. Нарив сайки хъамаличу хIисаврай бивкIра. Амма шайссарив, укун виламур дакIгу гьулусан дуллалисса масъала ххал бигьлагьисса чIумал, архну бацIан.
Качар ХIусайнаева
[dropcap]К[/dropcap]ьасумккант, хъуннасса райондалул вирдакI, хьхьириксса шяравалу дия – щюллишиврувун дахьларгсса, багъирдал чIюлу дурсса, ттизаманнул тIалавшиндарай, «супермаркетирттал», личIи-личIисса салоннал, фирмардал, идарарттал авадансса. Райондалул хъунама АьбдулмутIалибов Нариман Шамсуттиновичлул, жагьилсса интеллигент журалул адиминал, жу кьамул бунну цал цала кабинетраву. Ва ванал кIилчинсса мутта бия райондалул администрациялул хъунаманал къуллугърайсса. (Шиккува кIицI лаган, ванал жула ПатIимат Рамазановащал ва Тамара Шариповащал филологиялул факультет къуртал бувну бивкIун бия. Миннахьгу, цахьра дарс дирхьусса Роза Эльдаровахьгу ссалам буккайсса буси тIийгу ия.)
[pullquote]Цинявппагу гъалгъа тIутIинал зумув цава ца махъ бия, дакIниву цара ца дард дия: ниттил мазру бухлаглай бур, ми буруччинсса хIуччарду цалнияр цал чан хъанай бур тIисса. [/pullquote]
Райондалий ряхцIалазара инсан яхъанай усса ия. Мукьва миллиард арцул инвестициярттал шинай дучIайсса дия, мяйттуршва миллион райондалиясса авадан инсантурал кумагрангу (благотворительностран) биян байсса бия. Шанма школа бусса бия Кьасумккантлив, миву оьрчIругу арулазаруннийн бивсса бия.
[dropcap]Г[/dropcap]ьай-гьайкьай, гьар кIанай хIакьину дусса захIматшивуртту, шиккугу дакъа къадикIанссия. Арамтурал дянив ихтилат уттисса къуллугъирттал захIматшиврия, тIалавшиннарду шиная шинайн чIуллай душиврия, арцул масъала цалнияр цал кьянат хъанай бушиврия бия. Буслай бия районнал хажалатру хъуни къуллугъчитурал итталу дакъашиву. Халкьуннан зунсса кIанттурду бакъа, жагьилми, гьунар ххими, итххявхми райондалия ливхъун най бушиву.
[dropcap]А[/dropcap]мма Кьасумккант алжаннул аьрщарайсса кIану бия. Шикку хьу-къашайсса зат дакъая. Райондалий махъ нанисса арамтал цачIун хьуну (Яралиев, Шайдаев ва ялагу ца ацIа инсан), шикку чувчIав яла Дагъусттаннай бакъасса багъ бувгьуну бия. Багъ – миллионник. Ттуршра гектар дургьуссар, ряхцIалла ттигу дугьантIиссар тIий бия. Багъ цуппагу бия агротехникалул махъра-махъсса кIулшивуртту ишла дурну дузал бувсса. Италиянава бучIан бувну бия багъманчитал. Му даву канилух дурксса къабардиннацIа лавхьхьуну бия мурхьру бугьан ва миннуха ттизаманнул журалий къуллугъ буллан. «Капельное орошениелийсса» багъран кIия зузала гектарданун гьа хъанай усса ия. Бивхьусса харж ххину-ххишалану мукьра-ххюра шинава зана хьунтIиссар тIий, дакI дарцIуну бия. «Ашан» ва цайми мукуннасса ттучаннал хъуни сетирдащал икьрал дуссар дахху-ласулул, цичIар лув къадагьантIиссар тIий бия.
Даву дан ччисса, район гьаз дан гъира бусса халкь жучIава чан бакъархха, амма, пикри къабувну, хъирив къалавну, дихьлахьисса налогирттал, ялурзалтрал къанихшиврул инсантураву зунсса гъира лещан буллай бур тIий, хажалатрайгу бия.
— Дагъусттанная барачат лавгун бурив къакIулли, — дардирай ия ялагу Кьасумккантуллал райондалул бакIчи. — Цайми республикарттах бурувгун, жува цал цимигу шинай блокадалуву ливчIун бивкIру. Жуява прессалий укъачайсса бакъая. Оьчулий ккаккан буллай бивкIру. Аммарив Дагъусттаннал чулухунмай ялунгума ляличIисса хIисаврай буруглан аьркинссия тIиссара, къулагъас ххишаласса дикIан аьркинссия. Жува Аьрасатнал бакIссавнил дазу дуручлачисса инсантал бурухха. Гьарцагу чулухасса кьисмат чан бакъасса билаят бур жула. Царагу республикалуяр царагу ккаккиялул ялавайсса бакъару. ЧIунни Дагъусттаннах къулагъас ххишала дуван, хIурматрай буруган жула чулухунмай, жувагу жувува бусса гужгу, гьунаргу ххишала хайрдунунну ишла баншиврул.
[dropcap]К[/dropcap]ультуралул центрданул зал бувцIусса халкь бавтIун бия. Мероприятиялул заллухъруннал баян бунни батIаврил савав. Махъру лавхъуна райондалул администрациялул бакIчи Нариман АьбдулмутIалибовлул, информациялул ва печатьрал министр Рашид Акавовлул, Журналистурал союзрал председатель Аьли Камаловлул. Халкь хъинну чялишну гьуртту хъанай бия ва иширавух учин къахьунссар. ЦIана инсан сукку ан бигьа бакъар. Циняв хавардая, батIавурттая бизар хьуну бур. Амма бия хIадур хьусса, вардишсса, ва иширахун бавкьусса махъру лахълахъиссагу: шаэртал, журналистал, буккулт.
Цинявппагу гъалгъа тIутIинал зумув цава ца махъ бия, дакIниву цара ца дард дия: ниттил мазру бухлаглай бур, ми буруччинсса хIуччарду цалнияр цал чан хъанай бур тIисса.
Ттунма хъинну ххуй бивзуна ца доктор-хирург Нариман Салмановичлул увкумур. Мунал дакIнийн бувтуна депутатътурал миллатирттал мазру лахьхьаву программалий цIакь къабаврил хIакъиравусса закон кьамул даврил масъала. «На му иш аьрщи сукку шаврин ккалли бавияв. Ча, цукунни миллатирттал мазру оьрус мазрахун бахчилачисса? Щилли оьрус маз къума буллалисса? Циванни му бияла бакъасса багьана ниттил мазру лахьхьаврил хьхьичIун ласласисса? Жула вихшалдаран лайкьну къалявкъунни депутатътал, цала мазурдия ят бувцунни. Хъамабитан бан рязи хьунни ниттил мазру. Сайки бавкьунни жириновскийхъал политикалий. ХIакьину щала ниттил маз буруччаврил бияла ца миллатрал кказитрахун багьну бур.
[dropcap]М[/dropcap]иккугу «Почта России» так кказитирттан заралну зий бур. Хъунмур подпискалул багьлул бутIа миннан най бунугу, кказитру нажагь бакъа чIумуй букIлай бакъар. Мунихлу жаваб дулаймагу лякъин хъанай акъар. Жула кказитру хIакьину так ца пенсионертурал арцуйну бакI буклай бур. Жагьилми миллатирттал кказитру ккалай бакъар. Жува, хъиннува чIал хьуннин, жула оьрчIал, оьрчIал оьрчIал нааьнаралу къаличIаншиврул, бусса-бакъасса хIарачат бан аьркинссар, жула мазру ва ми мазурдийсса культура ядан…, — куна мунал.
Шикку ххи бансса бакъар. Ми махъру жулагу зумувнувасса махъру бур. Му жунна цинявннан аьмсса дард дур. Лазгиял кказитрал иш, ялагума, оьккину бакъассар. Кумагчиталгу вайннал чансса бакъассар. Вана Кьасумккантуллал райондалулгу, гьашинугу 1500 кказит чичаврищал архIал, лазги маз университетраву лахьлахьисса студентътуран бия-биялсса стипендиягу бивхьуну бур. Цайми-цаймигу хIаллихшиннарду дур, кумагру бур кказитран.
