Бигьалаган – Байкал бярнил зуманив

ОьрчIру тIайла буккан увкIун ия ДР-лул виваллил иширттал министр

Дагъусттан республикалул виваллил иширттал министр, полициялул генерал-лейтенант Аьвдурашид Ма­хIам­мадов хьунаавкьунни къуллугърал бурж бартбигьлай жанну дуллусса полициялул зузалтрал оьрчIащал. Виваллил иширттал министерстволул гьашинугу тIайла був­ккунни оьрчIру Бурятиянавун, Байкал бярнил зуманив бигьалаган.
Андриана Аьбдуллаева
— Зул буттахъул мудан дакIний бикIан­тIиссар, жун минная хъунмасса пахру бу­ссар. Миннал лайкьну бартбивгьуссар цала къуллугърал ва инсаншиврул бурж. Миннал къучагъшиву эбратну хьунтIиссар хъирив нанисса никирал дагъусттанлувтуран. Хъуни хьувкун, зущагу бюхъантIиссар, зула буттахъул кунма, ихтиярду дуруччай органнай зун. ДучIантIиссар чIун зу ттаттахъал къучагъшиврия зула оьрчIахь бусласисса. Жул умуд бур зуяту зула буттахъан лайкьсса оьрчIру-душру хьунссар тIисса, — увкунни министрнал, оьрчIру аьрххилий тIайла буклай.

Хъирив цинявппагу МВД-лул зузалтрал цIанияту министрнал барчаллагь баян бунни Бурятия республикалул виваллил ишир­ттал министр, полициялул генерал-майор Олег Кудиновлуйн, Байкал бярничIасса лагерьданийн къуллугърал бурж би­ттур буллай жанну дуллусса Да­гъусттаннал полициялул зузалтрал оьрчIайн оьвкуну тIий.
Гьашину вай оьрчIру шамилчинни ва лагерьданийн бигьалаган нанисса.

[dropcap]О[/dropcap]ьрчIахь ххуллухъин тIий, Аьвдурашид МахIаммадовлул насихIатрайсса маслихIатгу бунни республикалул кьатIув Дагъусттаннал цIа лайкьну дуруччин.
— Ва аьрххилий зун хъиннува чIявусса затру кIулхьунтIиссар жула билаятрая, зу дусшиву дан­тIиссар Аьрасатнал личIи-ли­чIисса регионнаясса оьрчIащал. ДакIру ххарину, тIааьнсса асардал вибувцIуну, зана хьуннав! — увкунни ххуллухъиндаран министрнал.
Хъирив цинявннал дирхьунни тIутIив къуллугърал бурж барт­бигьлай жанну дуллусса зу­залт­рансса гьайкалданучIа.