[dropcap]А[/dropcap]прельданул 6-нний Къизлар шагьрулий «Ттул Ватан – Аьрасат» тIисса цIанилу хьунни экстремизмалийн ва терроризмалийн къаршисса Аьра­сатнал халкьуннал аслийсса куль­туралул центрдал агитбригадарттал фестиваль. Ва дуллалиссар республикалул 4 округ­рай, Дагъусттаннал халкьуннал шаэр Расул ХIамзатовлун 95 шин шаврин хасну.

Бадрижамал Аьлиева
Ва кьини Къизлар шагьрулул Аьрасатнал халкьуннал аслийсса культуралул центрданий хьунни ДР-лул Ухссавнил округ­рал агитбригадардалмур фестиваль. Мунивух гьуртту хьунни Казбековуллал, Нугъайнал, ЦIуссалакрал, Хасавюртуллал, Бабаюртуллал, Тарумовкаллал, Къизлардал районнаясса ва Къизлар, Хасавюрт, Южно-Сухокумск шагьрурдаясса 10 коллектив.

Къизлар шагьрулул бакIчинал хъиривчу Татьяна Криничная, Тарумовкаллал Культуралул центрданул директор Сергей Шапошниковлуя, ДР-лул Музыкантътурал союзрал хъунама, профессор Хан Башировлуя, ДР-лул искусствалул лайкь хьусса ишккакку Абуссупиян Аьликъараевлуя, «Поколение» тIисса ансамбльданул каялувчи Наби Салаватовлуя сакин хьусса комиссиялун багьлай бия махъ МахIачкъалалив хьунтIисса гала-концертравух гьуртту хьунми язи бугьан.

ХьхьичIмахъ лавхъунни Татьяна Криничнаял:
— Цинявппагу гьурттучитуран ччай бур, ца зумату кунма, учин: «Бакъассар Дагъус­ттаннай терроризмалунсса ххуллу ва къабикIантIиссар! Расул ХIамзатовлул цIагу, мунал чивчумургу жунма дакIнийссаксса, республикалий дикIантIиссар дакьаву, аслахIшиву!» — куну.

Хан Баширов:
— ДакI ва яру ляличIинува ххари буллалисса бия ЦIуссалакрал, Къизлардал районнаясса, Къизлар шагьрулиясса коллективир­тталми номерду. Фестивальданул чIалачIи бунни тамашачитал укунсса журалул шадлугъирттах мякь бувккун бушиву. Барчаллагь хъунмасса ва байран сакин дурминнан, цинявппагу гьур­ттучитуран.
Фестивальданул сакиншинначитал бур ДР-лул Культуралул министерство, Республикалул Халкьуннал творчествалул къатта, Къизлар шагьрулул Аьра­сатнал халкьуннал аслийсса культуралул центр ва Культуралул управление.

Фестивальданул агьамми мурадру бур республикалул культуралул центрдал цала дянив­сса даврил опыт кIибачIаву, жагьилтал ватан ххирану тарбия шаву, халкьуннал дянив дакьаву, нахIушиву, личIи-личIисса диннал ва миллатирттал инсантал кувннан кув бувчIаву, хIалашиву дуруччаву.
«Ттул Ватан – Аьрасат» фес­­­тивальданул Зунтталмур округрал концерт хьунтIиссар апрельданул 19-нний Лаващав.