[dropcap]А[/dropcap]прельданул 14-нний УнцIу­кIуллал райондалий Шамилкъалаллал шяраву ДР-лул шяраваллил хозяйствалул ва бакIлахъиялул министр Аьбдулмуслим Аьбдулмуслимовлул дунни республикалул зунттал районнал округрал вакилтурал батIаву. БавтIминнал ххал бивгьунни инттухъунил давуртту даврил, яттил чIиру баврил ва ятту кIинтнил даэрдая зунттавунмай куч баврил масъалартту.
[dropcap]Р[/dropcap]еспубликалул шяраваллил хозяйствалул министрнал хъиривчу Шамил БахIарчиевлул бусаврийн бувну, кIинтнил даэрдай ризкьилул бакI бувккунни, къашавайсса ризкьи бакъар. Апрельданул 12-ннийнинсса ккаккиярттайн чул бивщуну, республикалий лавсун бур 3 млн. чIиру, миннувату кIинтнил даэрдай – 870 азарва чIи. Дагъусттаннай цинявппа ласун тIий бур 100 ттая 95 чIи. ЧIиру бувну къуртал хьувкун, ризкьичитуран аьркин­ссар ятту бувкьун махъ хIадур хьун зун­ттавунмай бачин.

ДР-лул Шяраваллил хозяйствалул министерствалул ххяххияртту дугьаврил управлениялул хъунама АхIмад Расуловлул бусаврийн бувну, республикалий интту хъуру дугьан ккаккан дурну дур 222 азарда гектарданий, миннувату 50 азарда гектар хъуруннал – зунттал районнай. Апрельданул 14-ннийнин республикалий хъуру гъайкуну дур 149 азарда гектарданий, миннувату зунттал районнай – 19 гектар. Ин­тту хъуру дургьуну дур 62 азарда гектарданий, миннувату 7,3 азарда гектар – зунттал районнай.

2018 шинал зунттал районнай ккаккан бувну бур буван 230 гектар цIусса багъирдал, гьашину ин­тту бувну бур 124 гектар багъирдал. БатIаврий мукунма бувсунни махъсса 3 шинал мутталий цIуну дугьлан бивкIшиву ччянияцIа къадугьлай бивкIсса 33 азарда гектар хъуруннал.
Ххал бивгьунни мукунма цаймигу масъалартту.

ХIадур бувссар
ХI. Аьдиловлул