Ватанлувтуращалсса хьунабакьаву

Ватанлувтуращалсса хьунабакьаву

Апрель зурул 22-нний Санкт-Петербурглив Дагъусттаннал диаспоралущал хьунаавкьунни Аьрасатнал Думалул депутат Аьвдулмажид МахIрамов.


Имара Саидова
Депутатнащал хьунабакьин бувкIун бия Дагъусттаннал республикалул постпредствалул зузалт, СПбГу-лул про­фессор ГъазимахIаммад ГъазимахIаммадов, дунияллул самболул кIийла чемпион ТIагьир Аьбдуллаев, Санкт-Петербургуллал боксрал спорт­рал федерациялул вице-пре­зидент Жамбулат Мутаев ва цаймигу.

Санкт-Петербургливсса постпредствалул вакил ХIасанов ХIасаннул кIицI лавгунни Аьвдулмажид МахIрамов цала ватанлувтуращал ччя-ччяни хьунаакьайшиву ва миннал ма­съалартту щаллу баврил чIарав ацIайшиву. Ватанлувтурах дуллалисса аякьалухлу ХIасаннул депутатнахь барчаллагь увкунни ва цала даву гихуннайгу дуллансса каши-кьудрат чIа увкунни.

Постпредствалул отделданул хъунмур Надежда Щербаковал бувсунни май зурул 24-26-нний Санкт-Петербурглив хьунтIисса, ДР-лул президент Владимир Васильев бакIчисса, Дагъусттаннал делегациялулгу гьурттушинна дантIисса дунияллул халкьуннал дянивсса экономикалул форумрайнсса хIадуршиннардая. Ванил мукунма бувсунни Да­гъусттаннал республикалул Аьра­­сатнал Федерациялул субъектирдащал, хьхьичIунсса предприятиярттащал чичинтIисса агьамсса кьутIирдая.

Аьвдулмажид МахIрамовлул балжину бувсунни АьФ-лул ПаччахIлугърал Думалул Федерал Мажлисрал комитетрал, цIуллу-сагъшиву дуруччаву мурадрай, дуллалисса даврия ва цIа кусса проектирдая. КIицI лавгунни ца яла агьаммур ма­съала цIуллу-сагъшиву дуру­ччаврин аьркинссаксса арцу итадакьаву бушиву ва цивппагу му масъала щаллу бавриха зий бушиву.
Ахирданий депутатнал жавабру дуллунни ватанлувтурал буллусса суаллахьхьун.

Читайте также: